Facebook-ah La Liga kan en tawh dawn!

Khawvela social networking site hman hlawh ber Facebook chuan India leh a chhehvel rama La Liga match live-a chhuah phalna an lei a, season thum chhung atan Spanish league sang ber thuneitute nen hian an inrem.

India mai bakah a ṭhenawm ram Afghanistan, Bangladesh, Bhutan, Nepal, Maldives, Sri Lanka leh Pakistan te chuan Facebook kaltlangin La Liga hi an en ṭhin tawh dawn tihna a ni a, season hmasa thleng kha chuan Sony Pictures Network-in an pe chhuak ṭhin.

La Liga leh Facebook inremna zat hi tarlan a ni lo. Mahse, Sony chuan 2014-2018 inkara India leh a chhehvela La Liga chhuah nan hian dollar maktaduai 32 an inseng a, Facebook sum sen zat hi chu a pung ngei tura ngaih a ni.

Engtin maw?

Facebook-ah video a en theih tawh ṭhin a, India, Afghanistan, Bangladesh, Bhutan, Nepal, Maldives, Sri Lanka leh Pakistan te hian sum sen belh ngai loin La Liga hi facebook aṭangin live-in an en thei tawh dawn tihna a ni.

Zirtawpni zan aṭanga khelh ṭan tur La Liga-ah hian season khatah match 380 a awm dawn a, heng match zawng zawng hi India leh a chhehvela ram te chuan a thlawnin an en thei dawn.

La Liga head of digital strategy Alfredo Bermejo chuan, "India leh a chhehvel ram te hi an pawimawh em em a, heng ang ram pawimawh taka a thlawn liau liaua inkhel kan pe chhuak thei tur hian min ti lawm takzet a ni," tiin a sawi.

Facebook leh India

Tun dinhmunah Indian sub-continent-ah hian Facebook hmang mi maktaduai 348 an awm a, chung zinga maktaduai 270 chu India aṭangin a ni. Facebook hian La Liga hi India leh a chhehvel ram te chauhin an en theih nan Facebook monitoring system hmangin an veng dawn a ni.

Digital lama La Liga hotupa Alfredo Bermejo chuan, "Tun hnai kum hnih chhunga kan hnathawhna leh kan tum lian ber chu a tam thei ang berin an en theih tura La Liga chhawpchhuah hi a ni a, India rama hmangtu mi maktaduai 270 nei thei Facebook nena inremna kan nei hi ka lawm takzet a ni," a ti.

La Liga India manager Jose Antonio Cachaza chuan, "India ramah La Liga a ṭhang ve zel a, kan tan chuan hei hi hmalakna pawimawh tak a ni. Hlawhtlinna duhawm tak kan hmuh theih nan theihtawp kan chhuah ang," tiin a sawi.

Facebook leh Sports

Facebook hian La Liga hma hian USA lama inelna lar tak Major League Baseball chu US bika entute zinga chhuah turin inremna an lo neihpui tawh a, match khat an chhuah manah dollar maktaduai khat zel MLS hotute hnenah an pe.

MLS hi tun dinhmunah chuan facebook-a thil dang ang thoin a free-in pek chhuah a ni a, mahse advertisement a awm thung. Facebook director of global live sports Peter Hutton chuan La Liga hi a thlawn a nih piahlamah advertisement awm miah loa an chhuah phawt tur thu a sawi a, "Kal zel dan tur chu kan la ngaihtuah leh ang," a ti.

Online khawvelin ro a rel mek zel a, Facebook chauh lo pawhin infiamna huang thlengin an luhchilh tawh. Amazon chuan season thar aṭangin Premier League match 20 an live dawn a, anni vek hian USA-a National Football League (NFL) chu inremna an lo neipui tawh bawk. US pawn lamah China chuan National Basketball Association (NBA) chu Tencent kaltlangin live-in an en ṭhin bawk.