Novak Djokovic a tho chhuak

World number 1 hlui Novak Djokovic chuan Toronto lama a mualphona hliahkhuh tumin chona thar a hmachhawn leh nghal a, Thawhṭanni zan khan Steve Johnson hnehin Cincinnati Masters first round a paltlang.

Serbian tlangval Djokovic hi Rogers Cup-ah third round a pel lo a, Greek rawlthar Stefanos Tsitsipas lakah a chak lo a ni. Mahse, Cincinnati-ah erawh Djokovic hian a theihna tak lantirin khawtual tlangval Johnson hi 6-4, 7-6 (7-4) in a hneh.

World number 1 hlui Djokovic hian tun hmain Cincinnati Masters-ah hian final vawi nga a khel tawh, hetichung hian nomawi a la chawi miah lo. Tennis season kal laiah clay leh grass court season an hmang zo tawh a, hard court-ah hlawhtlin a duh a nih chuan tun ṭumah hian a chet ṭhat a pawimawh ang.