Serena tan hna a harsa lo

Serena Williams chuan darkar khat leh minute nga chhung lekin Daria Gavrilova hnehin Cincinatti Open second round a lut a, set hnih an khelh chhungin Australian nula service hi vawi hnih ve ve chhuhsakin 6-1, 6-2 in hnehna a chang.

Grand Slam vawi 23 champion tawh Serena hian winners vawi 27 a vaw chhuak a, world number 23 Gavrilova tan Serena ball vuak hi vuak let a harsat bakah a service a dawng zo lo hle.

Kar hmasa mai khan Serena hian Johanna Konta lakah tennis a khelh tawh china a chak loh chian ber ṭum a tawng, tunah erawh a khelh dan phung pangngaiin a khel thei leh tawh; a match lehpekah chuan seeded pariatna Petra Kvitova nen an intawng leh ang.

Kum 36 mi Serena chuan, "Wimbledon kha ka tan chuan zinkawng bul inṭan thar lehna a ni a, engtikniah emaw chuan ṭha takin ka khel leh thei ang tiin ka inngaihtuah ṭhin. He hmunah hian ka nihna chu a takin a lang leh ta," a ti. Serena khingpui tur Kvitova hi Wimbledon vawi hnih champion tawh a ni a, first round-ah a bye avangin Serena tan fiahna tak a tling dawn.

Inkhel dangah Aryna Sabalenka chuan Britain chhuanvawr Konta chu 4-6, 6-3, 6-4 in a hneh a, kar hmasa lawkah Serena hnehtu Konta hian double faults vawi 10 a neih bakah a service vawi li a hloh–a match lehpekah seeded pakuana Karolina Pliskova nen an inkhel leh ang.

Hmeichhe singles first round inkhel dangah Ajla Tomljanovic, Victoria Azarenka, Julia Goerges, Svetlana Kuznetsova, Aryna Sabalenka, Anett Kontaveit, Lesia Tsurenko leh Viktoria Kuzmova te an tlang a, Grand Slam vawi sarih champion tawh Venus Williams erawh a khup hliam vangin a inhnukdawk.