Chhinga Vengin a zawnin nomawi 5 an chawi

LG Independence Cup 2018-ah Chhinga Vengin champion turin nizan khan Aizawl FC chu 1-0 in an hneh. Lammual inkhel hmuhnawm taka goal awmchhun khungtu hi MS Dawngliana a ni.

Mizo coach ṭha Lalsangzuala Hmar kaihhruai Chhingcows hian season liam ta khan MFA hnuaia inelna MFA Super Cup, I Day Football leh Mizoram Premier League te an champion vek a, kuminah MFA Super Cup nomawi an humhim hnuah I Day Football hum lehin inlena pangaah a zawnin an champion.

Chhum zing karah
Inkhelh ṭan aṭanga rei loteah Chhinga Veng midfielder Lalmuansanga chu inhliam avangin minute 7-naah lakchhuah a ni a, Lalremruata luhtir nghal a ni.

Chhingcows-in an khelh dan hmang thlakin Lalromawia chu midfield pui tura pawh let a ni a, Tuikual North tlangval Remruata hi tlarhmaah awmin a luh aṭanga rei loteah goal ban a tauh per nghal. Kumin Santosh Trophy-a Mizoram tana goal khung tam ber Romawia ball pet goal kham chungah chiah a kal bawk.

Ṭum dang ang bawkin set piece-ah Aizawl FC an hlauhawm a, freekick aṭanga ball kal chu Lalrinchhana Tochhawng-in hnai tak aṭangin a bin over. Tun inelna goal khung tam ber Lalkhawpuimawia chu a club hlui ten an veng uluk a, Kelkang tlangval a langsar lo.

First half-ah hian chhum zing vangin hun rei tak chawlh a ngai a, amaherawhchu final-a inhmachhawn pahnih Chhingcows leh AFC ten player an neih ṭhat avangin inkhel a hmuhnawm tho.

Danglamna Dawngtea
Chhinga Vengin season liam taa an goal khungtu Malsawmfela leh Mapuia te chan mah se Dawngtea'n a koa tla mawhphurhna a la hneh hl

Bawngkawn tlangval Dawngtea hian minute 54-naah penalty aṭangin a khung. He goal luh theih nan right back Vanlalchhuanga chuan ding lam kilah ball a la lut ṭha a, box chhungah Remruata'n ball chang fuhin Dawngtea a pe leh a, Chhinga Veng forward hian penalty aṭangin tun inelnaa a goal thumna a khung.

A tawp lam
Chhinga Veng tan nomawi chawi turin an goal venhim a ṭul a, khung belh aiin venhim hna an thawk nasa zawk. Aizawl FC goal nawr a na sawt a, amaherawhchu goal chance ṭha insiam an harsat. Vanneih beiseiin tawnhriat nei ṭha David Lalrinmuana te luhtir mah se inkhel a thlak danglam thei lo.

Hun tawp lamah goal mamawh Aizawl FC goal nawr a na tawh lo a, Chhinga Vengin inrintawkna nen an khel tawh a, an phu ang ngeiin nomawi an humhim.

Vice President tan
Mizoram football history-ah Chhinga Vengin chanchin duhawm bik an hnutchhiah a, nomawi panga a zawna chawi hi thil namai a ni lo. Player ṭha tam takin an chhuahsan a, chutichung chuan season ṭan nan nomawi pahnih an chawi nawn a, coach Lalsangzuala Hmar thawhrimna leh remhriatna bakah Chhinga Veng club chhungkua thawhhona a fakawm hle.

Chhinga Veng manager H. Lalremruata chuan, "I Day Football-a kan champion hi kan lawm a, kan nomawi hlu tak hi kan vice president Pi Sawmi tan kan hlan," tiin a sawi. Chhingcows vice president Lalsawmliani hi nimin zing khan kal ṭha lo avangin a thi.

Champion Kalkawng
Chhinga Veng
Group Stage
Chhinga Veng FC 2-0 Kanan FC
CVFC: Vanlalzuidika 13'; Lalromawia 73'
MoM: Lalromawia, CVFC
Mizoram Police 1–2 Chhinga Veng FC
MPFC: R Malsawmtluanga 43' (P)
CVFC: Lalmuansanga 18'; Lalrinchhana 87'
MoM: MS Dawngliana, CVFC
Chhinga Veng 1-0 Jamshedpur
CVFC: MS Dawngliana 3'
MoM: MS Dawngliana, CVFC
Chawnpui FC 0–1 Chhinga Veng
CVFC: MS Dawngliana 70'
MoM: Lalruatfela, Chawnpui FC
Semifinal
Electric Veng FC 0–2 Chhinga Veng FC
CVFC: Lalrinchhana 36'; Lalthlamuana 62'
MoM: F Lalnuntluanga, Chhinga Veng FC
final
Aizawl FC 0 - 1 Chhinga Veng FC
CVFC: MS Dawngliana 54'

Lawmman
Champion Chhinag Veng FC Rs 1,00,000 + Trophy
Runner Up Aizawl FC Rs 80,000

Semifinalist Mizoram Police Rs 50,000
Electric Veng FC Rs 50,000
Fair Play Aizawl FC Rs 30,000
Mimal Lawmman
Best Player MS. Dawngliana, CVFC Rs 5,000
Best Forward Lalkhawpuimawia, AFC Rs 4,000
Best Midfielder Lalrinchhana, CVFC Rs 4,000
Best Defender Lalrinchhana Tochhawng, AFC Rs 4,000
Best Goalkeeper T. Zothanmawia, CVFC Rs 4,000

Final-ah tu ten nge bul ṭan?
Aizawl FC-in 4-2-3-1 an hmang a, goalkeeper-ah Lalremruata awmin tlarhnungah Lalrinchhana Tochhawng leh Lalhriatrenga te an inkawp a, mual sirah Joe Zoherliana leh Lalramhmunmawia (Te-a) te an awm.
Midfield laiah Alfred Kemah Jaryan, Paul Ramfangzauva leh K. Lalhmangaihkima te awmin tlarhmaah Khawpuimawia (Mapuia) a mal tlat a, Kelkang tlangval Mapuia hi mual sir aṭangin Lalrinfela leh Rochharzela ten an thlawp.

Chhinga Vengin 4-4-2 foramtion an hmang thung a, defence laiah MFA Super Cup best defender PC Laldinpuia leh Vanlalzuidika te an awm a, Vanlalchhuanga leh Hmingthanmawia te chu ding leh veiah an awm bawk.
Goalkeeper-ah Zothanmawia a awm a, midfielder palian lo pahnih Lalmuansanga leh Lalrinchhana te a laiah an inkawp. Tlarhmaah Lalrammawia leh Lalromawia te an awm a, F. Lalnuntluanga leh MS Dawngliana te chu mual sirah an awm. Out and Out striker tel loin bul ṭan mah se an tlarhma te chu intlan thelh thei vek an nih avangin Lalsangzuala Hmar hote hi ven harsa tur an ni.