Zaninah LBS Suzuki CYMA Basketball semifinal
Tualchhung basketball inelna ngaihhlut LBS Suzuki CYMA Basketball semifinal chu zanin hian R. Dengṭhuama Multipurpose Hall-ah khelh a ni dawn.
Khatla South leh Chawnpui ten zanin dar 6:00-ah semifinal hmasa zawk an khel ang a, semifinal hnuhnung zawk hi zan dar 8:00-ah khelh a ni dawn. Champion rinkai Ramthar Veng hnehtu Khatla leh coach ṭha Samuel Lalthlamuana enkawl Bungkawn ten final luh an inchuh ang.
Ṭhazuala telna Bungkawn
Nimin match hmasa berah Bungkawnin Dawrpui 83-61 in an sawp a, NIS chhuak Samuel Lalthlamuana (El-a) enkawl team an danglam a, coach El-a hi CYMA Basketball-a Chanmari champion pui tawhtu a ni.
Bungkawn hian Tuikual South an hneh ṭuma an chhawr theih loh Vanlalṭhazuala an hmang thei tawh a, MSL club Khatla TBL player hian point 31 zet neiin R. Lalnunpuia'n point 19 a rawn belh bawk a, an phu ang ngeiin hnehna an chang.
Team tlo Khatla South
Khatla South-in quarter hmasa berah Leitan lakah 19-12 in hma an hruai nghal a, hun tawp hnaih thlengin inum chho mah se Khatla South-in harsatna lian tham tawng loin 82-74 in an hneh. Leitan-in quarterfinal thleng turin Dawrpui Vengthar nen overtime an khel a, an khingpui Khatla South pawhin hahdamna hun nei bik lo mah se an khingpui hautak zawkna hi an tuar tih a lang. Chutihrualin Gospel Lalthawmmawia leh Lalrinzuala Hnamte te awmna Khatla South an ṭha zawk a, hnehna an chan theih nan K. Zonuntluanga chuan point 31 zet a nei a ni.
A tawpah Chawnpui
Chawnpui leh Ramhlun North te an inkhel tawk. MSL-a player langsar Michael F. Lalawmpuia leh Mapuia Zote te awmna veng Ramhlun North-in third quarter zawhah 53-48 in hma an hruai.
Amaherawhchu rilru huaisen lan hun quarter tawp berah Chawnpui 22-7 in an chungnung a, 70-60 in an chak. Chawnpui tan Zodina Chawngthu, Jackson Lalrintluanga, Laltlanhlua leh Lalremsanga te an khel ṭha hle.
Khatla an tlo
Khatla-in an match hmasa berah MSL4 MVP Lalrina Renthlei telna Tuikhuahtlang an hneh tawh a, tun ṭumah hian MSL4-a Zarkawt BCA champion puitu Zonunsanga leh Lalremsanga te awmna Ramthar Veng chu 81-71 in an hneh.
Khatla tan ṭum dang ang thoin Vanlalnunsanga (Lana) a khel ṭha leh a, an lenna an hman thiam avangin talent nei ṭha zawka ngaih Ramthar lakah inkhel an thunun tluan. MSL club Khatla TBL player Eddie Zaithanmawia, Chuaudingliana leh Brandon te an ṭangkai a, zanina Bungkawn nen an inkhel tur a hmuhnawm khawp ang.
Quarterfinal - Nimin Inkhel Results
R. Dengthuama Multipurpose Hall
Bungkawn 83 - 61 Dawrpui
Khatla South 82 - 74 Leitan
Ramhlun North 60 - 70 Chawnpui
Ramthar Veng 71 - 81 Khatla
Semifinal - Zanin
6:00 PM Khatla South Vs Chawnpui
8:00 PM Khatla Vs Bungkawn