Federer hna a awlsam

Roger Federer chuan a vawi riat nana Cincinnati Masters title lak a tumna kawngah bul a ṭan fuh hle, Swiss star hian nimin zing khan Peter Gojowczyk chu straight sets a hnehin last 16 a lut.

Kum 37 a tlin hnuah Federer tan a tournament hmasa ber a ni a, seeded pahnihna hian darkar khat leh minute 13 chhungin world number 47 lakah hian 6-4, 6-4 in hnehna a chang. Federer hian a match lehpekah chuan Leonardo Mayer a hmachhawn leh ang.

2013 khan Rafael Nadal hneh loin Federer hi quarterfinal-ah a tla a, hemi hnuah a vawi khat nan Cincinnati Masters a khel leh chiah. Federer chuan, "Court chhunga ka luh chiah khan he hmunah hian hun rei tak ka khel lo tih a hriat loh, harsatna hrang hrang paltlang hnuah ka inlan leh thei hi ka lawm," tiin a sawi.

Season hmasa finalist Nick Kyrgios chuan harsa takin Denis Kudla lakah 6-7 (2), 7-5, 7-6 (9) in hnehna a chang a, seeded 11-na David Goffin pawhin 7-5, 6-3 in Stefanos Tsitsipas a hneh bawk – Australian Open semifinal khel phak Hyeon Chung leh Leonardo Mayer te pawhin round sang zawk an inhlangkai ve bawk.