Mandzukic-a'n ram tana inkhelh chawlhsan

Croatia forward Mario Mandzukic chuan an ram chu a vawi khat nan World Cup final thlenpui mah se pakhatna an ni zo lo a, ram tana match dang khelh leh tur a awm hmain international football a chawlhsan thu a puang.

Zlatko Dalic-a naute khan knock out stage-ah Denmark, England leh a thlengtu Russia te an hneh a, French nen nomawi an inchuhna inkhelah 4-2 in chak lo mah se Mandzukic hian goal khat a khung.

Kum 32 mi Mandzukic chuan, "Kan suangtuahna ram chu a takin kan thlen tir a, fans thlawpna ṭha tak kan dawn bakah kan ram chhungah ropui taka lawmluh kan ni bawk. Ka tan chuan zinkawng ngaihnawm tak a ni, World Cup silver medal kan dawn khan chakna thar min pe a, ka chawlh tur thu pawh hi sawi a harsat phah hle.

"A nihna takah chuan chawlh hun tur dik a awm thei lo ang, kan dam a nih chuan Croatia tan hian kan thisen far tawp thleng pawhin kan ṭang mai tur a ni. Mahse, football-ah chuan chutiang ngawt a ni thei lo, ṭhangthar hmabak nei eng zawkte hmun kan ken a ṭul," tiin a sawi a, hun lo kal turah an ram team chu hlawhtlinna chang ngei turin duhsakna a hlan bawk.

Slavonski Brod, SR Croatia-a piang Mandzukic hi club lamah chuan tun hmain Bayern Munich leh Atletico Madrid tan pawh a khel tawh a, tunah chuan Juventus tan a khel mek; Italian club tan match 127 a khelh tawhah goal 34 a khung sak tawh a ni.