Celtic beiseina a thamral

Scottish club Celtic chuan Champions League-ah an hmel an lan dawn ta lo - Brendan Rodgers-a naute hian khualmualah AEK Athens chu 2-1 in an ngam lo a, inkhel hmasaah 1-1 a an lo inhnehtawkpui tawh bawk si avangin inkhel pahniha an tlawmna zat chu 3-2 a ni.

AEK Athens-in hnehna an chan avangin playoff khel turin an inpetkai a, Celtic tan erawh Champions League group stage-a inlan tur chuan season thar nghah a ngai ta rih.

Celtic petchhuah an nih lai hian Ajax erawh Champions League khelh ngei tumin hmalam an pan zel a, goal hnih ve ve khunga an inhnehtawkpui tawh hnu Standard Liege chu 3-0 a an sawp avangin inkhel pahnih belhkhawmah 5-2 in an chak.

Beisei phak lo

Celtic-in AEK Athens an mikhual ṭumin 1-1 in an inhneh­tawkpui a, away goal hlutzia leh Greece-a inkhelh harsatzia ngaihtuahin Celtic Park result hi a pawi - mahse Celtic boss Brendan Rodgers-a'n an hlauhthawn loh thu a sawi a, playoff inpetkai theih beiseina sang tak a nei.

Mahse, Rodgers-a beisei ang ngawtin thil a kal lo. Inkhelh ṭan aṭanga minute rukna lekah Athens lamin goal an khung ṭan a, defender Brito chuan goal hmahruai a khung. Celtic lamin a chhanletna tur an nei lawk thei lo a, mualneitu bawkin goal an khung nawn.

Marko Livaja chuan minute 50-naah AEK goal hnihna a khung a, Celtic an hawihawi. Hun tawp nan minute hnih chauh a awm tawh tihah Sinclair chuan an si phurh rawn sut ṭhen ve bawk mah se si phurh sut zo turin hunin a daih tawh lo.

Celtic an buai?

Tun hnaiah Celtic chhungkaw boruak a ṭha lo niin a lang a, khelmual pawn an buaina hian a chhung lamah nghawng a nei. Brendan Rodgers-a'n transfer bazar-ah a beisei ang sum hman tur a nei tawk lo a, hei hi ualau takin a ti lang.

Celtic thuneitu lam erawhin transfer bazar an hmang ṭha tawk­ah an inngai thung a, hei hian club board leh manager inkarah khi a siam. Celtic hi an league match hnihnaa Hearts hneh lo hlim an ni bawk a, Steven Gerrard hoa Rangers insiamṭhat mek lai a nih bawk avangin Scottish football-ah pawh an dinhmun a him lo.

Gerrard hian Rangers a enkawl hnuah competitive match-ah an la tlawm miah lo a, zanin dar 11:45 hian Maribor nen Europa League third qualifying round second leg an khel ang- match hmasaah 3-1 in an chak tawh.

Hei le Ajax

Dutch club ṭha Ajax-in Champions League playoff lut turin harsatna an tawk lo a, Belgian club ṭha Standard Liege chu 3-0 ngawtin an sawp - inkhel pahniha an chakna chu 5-2 a ni a, playoff-ah hian Dynamo Kiev an hmachhawn ang.

Ajax tan Klaas-Jan Huntelaar chu player langsar a ni a, Dutch striker hian minute 30-na lekah goal hmahruai a khung - a match hnuhnung pali a goal li a khungna chiah a ni a, Matthijs de Ligt leh David Neres ten an belh ve bawk.

Kum 35 mi Huntelaar hi 2017 khan Schalke aṭangin a hming chherna Ajax-ah hian a kir a, season hmasaah khan match 32 khelin goal 13 a khung a, tun season-ah match nga khelin goal li a khung tawh thung.