US Open khel tur Wawrinka

Tennis tournament zinga lawmman sum tamna ber US Open chu September thla tirah khelh a ni dawn a, inelna buatsaih tur lam chuan an duhsak zawng hnenah qualifier khelh ngai loa inlan theihna tur 'wildcard' an pe; an zingah hian Stan Wawrinka leh Svetlana Kuznetsova te bakah Australian Open vawi hnih champion tawh Victoria Azarenka te an tel.

Switzerland tlangval Wawrinka-a'n 2016 khan Novak Djokovic hnehin nomawi a chawi tawh. Mahse, a khup hliam vangin tun hnaiah a tla hniam a, tun dinhmunah world number 151 ni mekin, wildcard pe lo se la chuan qualifier aṭanga a khelh a ngai dawn a ni.

Kum 33 mi Kuznetsova pawhin tleirawl a nih lai 2004 khan New York khawpuiah hian hlawhtlinna a lo chang tawh. Stan ang bawkin ani pawh hi a ban rek vei lam zai a ni a, world number 88 a ni mek.

World nuber 1 hlui Azarenka-i'n US Open-ah hian final vawi hnih a khel tawh, 2012 leh 2013 khan a thiam pahnih zingah tel phak mah se khawtual player chhuanvawr Serena Williams a ngam lo - kumina duhsakna a dawng hi a mak lo.

Hmeichhe singles khel tur hian junior champion lai Amanda Anisimova, Claire Liu were, Asia Muhammad, Whitney Osuigwe leh Harmony Tan te chu wildcard pek an ni a, hmunruak pakhat a la awm. Mipa singles lamah Tim Smyczek, Michael Mmoh, Noah Rubin, Corentin Moutet, Jason Kubler, Bradley Klahn leh Jenson Brooksby te chu pek an ni bawk.