Formula 1 chawlhsan tur Alonso

Fernando Alonso chuan tun season tawp rualin Formula 1 inlena a chawlhsan tur thu a tichiang a, a zawna kum nga chhung car a khalh sak tawh McLaren chu a mangṭha dawn tihna a ni.

Kum 37 mi Alonso hian 2005 leh 2006 khan car intlansiakna sang berah hian hlawhtlinna a lo chang tawh a, hetih hunlai hian Renault car a khalh ṭhin. Driver theihna nei sang tak ni mah se tun hnaiah erawh beisei a phak lo - F1 huangah hian season 17 zet hun a hmang hman.

Spanish driver Alonso chuan, "Season 17 chhung ka chamchilh hnuah ka tan khawvel dang neih a hun ve tawh, tun season chhungin inelna tamtak hmachhawn tur la nei mah ila he thutlukna hi ka siamna a rei tawh. Hma hunah eng nge rawn thleng dawn kan hre lawk lo a, hringnun hian chona thar a hmachhawn a ngaih chang a awm," tiin a sawi.

Tun season Formula 1-ah hian intlansiak vawi 21 a awm dawn a, heng zinga 12 an tlan tawh. Alonso hian point 44 hmu tawhin driver championship-ah pakuana a ni mek; August 28 hian Belgian Grand Prix an tlan leh ang.