Serena zinkawng a tawp

US Open inbuatsaihna tournament langsar Cincinnati Masters khelh laiah Serena Williams chuan bul ṭan ṭha hle mah se, nimin zing khan a match hnihna khelin Petra Kvitova chu 6-3, 2-6, 6-3 a hneh loin second round a paltlang zo lo.

American star Serena hian 2015 khan Cincinnati Masters nomawi a chawi a, hlawhtlinna a chan hnuah tun ṭum hi he tournament-a a tel lehna hmasa ber a ni. Wimbledon vawi hnih champion tawh Kvitova nen an inkhel tawk hle, darkar hnih zet an inkhelh hnuah a vanduai zawkah a ṭang ta a ni.

Kum 36 mi Serena hian fa a neih hnuah Wimbledon final khel phal leh hial tawh mah se, kar hmasa khan San Jose-ah a mualpho; hard court season hman ṭhat tumin thapui thawh zui nghal mah se a tum ram a la thleng thei rih lo.

Czech Republic nula Kvitova chuan, "Engtiklai pawhin Serena nen court chhunga intawn hi chu a nuam ṭhin, vawiinah chuan a khel ṭha zawk ka ni a, player ropui zawk ka ni tihna erawh a ni kher lo," tiin a hneh loh player a dahsang thiam hle. Serena pawhin fa a neih hnuah a tan tun hma angin inelna a la pangngai theih chiah loh thu a sawi ve bawk.

Inkhel dangah seeded pangana Svitolina chuan darkar hnih leh minute 43 hnuah Svetlana Kuznetsova chu 7-6 (7-1), 4-6, 6-4 in a hneh a, seeded parukna Garcia pawhin 2013 champion Victoria Azarenka 6-4, 7-5 a hnehin third round a inhlangkai ve bawk.

2016 champion Pliskova pawhin world number 2 hlui Agnieszka Radwanska nen an intawn vawi riatnaah hnehna a chang ve chiah, Pliskova hian Polish nula hi 6-3, 6-3 in a hneh.