Ramos-a'n Klopp a tih el

Real Madrid captain Sergio Ramos chuan Cham­pions League final-a Mohamed Salah a tihnat chungchanga a chet dan demtu Liverpool manager Jurgen Klopp a kap let a, "Keini chu level sang taka hun rei tak awm tawh kan ni a, ani chu a ni ve kher lo mai thei," a ti!

Klopp hian Ramos chu Salah laka a chet danah a 'rawng mah mah' niin a sawi a, Spanish defender ngaihdan erawh a dang thung. Real captain chuan, "Player tihnat tum sa ranin ka che ngai lo. Klopp hian final-a an chak loh chungchang zawk kha sawifiah a duh mai thei, mahse tun hi final-a a chak loh vawi khatna a ni lo a ni lawm ni," tiin a ṭawng ngeiawm hle.

German coach hian kum 2012 khan German Cup-ah Borussia Dort­mund chu hnehna chanpuiin a champion a, a hnua major tournament final-a luh vawi rukah erawh a tlawm vek - heng zingah hian Liverpool a enkawl hnua League Cup, Europa League leh Champions League final-a an chak loh a tel.

Klopp hian Salah vang chauhin Ramos hi a sawisel lo a, Liverpool goalkeeper Loris Karius-a'n Champions League final-a a hriatna a hloh 'zuai' chhanah pawh Ramos nena an intauhna chu a puh.

Ramos hian ngeiawm takin Klopp ṭawng el mah se Reds manager chu a dah san reng thu erawh a sawi a, "Khawvela ma­na­ger ṭha ber thlang tura vote kan thlak khan Klopp hi ka thlan chu a ni a, chuvangin hahdam takin awm rawh se," tiin a sawi.