Sawisel kaiin Man United-in Aston Villa an hneh

Manchester United chuan FA Cup fourth round-a Middlesbrough hmachhawn turin Thawhlehni zan khan Old Trafford-ah Aston Villa 1-0 in an hneh. Goal awmchhun hi minute riatna leka Scott McTominay-a tauh luh a ni.

Steven Gerrard-a'n manager ni chunga Old Trafford-a a lenluh hmasak berah thawm a nei lian a, Liverpool legend hian hnehna chang zo lo mah se chakphu khawpin an khel ṭha. Villa goal hnih khung pawmsak an ni lo a, Danny Ings goal khung pawm lohin sawizui a hlawh hle.

Ronaldo tel lohna
Manchester United manager Ralf Rangnick chuan bul ṭantu zingah Cristiano Ronaldo, Jadon Sancho, Harry Maguire leh Phil Jones te a telh lo a, squad-ah a dah tel lo.

German manager-in 4-2-2-2 bawk rawn hmangin David de Gea, Diogo Dalot, Victor Lindelof, Raphael Varane leh Luke Shaw te tlarhnungah an intlar. Defence thlawp turin McFred an tih mai McTominay leh Fred te an awm. Tlarhma lamah Bruno Fernandes, Marcus Rashford, Edinson Cavani leh Mason Greenwood te an awm.

Inkhelh banah Rangnick chuan, "Ka player chhawr loh ho hi inhliam tiha chhal tur chu an ni chiah lo a, mahse an tihrawlah harsatna an tawk. FA Cup-ah chuan minute 120 khelh palh theih a nih avangin fimkhur a ṭul a ni," tiin Ronaldo leh player dang a chhawr loh chhan a sawifiah.

Goal khat chauh
Man United-in bul an ṭan ṭha a, minute riatna lekah Luke Shaw corner pet aṭanga kal zel chu Villa player-ten an clear thei lo a, dinglam aṭanga Fred-a cross luh chu McTominay-a'n a tauh lut.

Goal luh hnuah Aston Villa an che ṭha ta zawk a, John McGinn leh Emiliano Buendia ten De Gea tan hna an siam. Minute 30-naah Lindelof-a ball la thlak sual zarah Ollie Watkins-a'n chance ṭha insiamchawpin hnai tak aṭangin crossbar a pet per.

Second half-ah goal mamawh Villa goal bawh a na a, minute 50-naah McGinn-a freekick pet chu Konsa-a'n tauh letin Ings-a'n a tauh lut. VAR hmanga enlet a nih hnuah pawm a ni lo.

Minute 59-naah Ings-a'n chance ṭha a neih chu goal-ah chantir thei lo mah se Watkins-a'n a tlawh goal tho. Villa-in siphurh sutah inngai hman mah se offside vangin pawm a ni lo.

Villa right back Matty Cash-a'n keeper De Gea tan a siam ve leh a, Spanish keeper a che ṭha. Man United-in chak nemnghehna remchang an nei a, Mason Greenwood-a'n amah thlawptu Marcus Rashford pe loin goal-a pet a thlang a, keeper Emiliano Martinez-a'n harsatna nei loin a dang.

Hun tawp thlengin Man United nuam sain an awm lo a, amaherawhchu a pawimawh ber goal an khung bakah minute 90 chhung an ṭan tluan avangin 1-0 in hnehna an chang.

Beisei pha lo United
Manchester United-in inkhel thunun an la harsat a, manager lailawk Rangnick a duh danin an la khel chhuak thei lo. United ten ho lam taka ball hloh an la ngah a, chung zingah chuan Marcus Rashford a tel.

Kum 24 mi Rashford hian inhliam vangin season bul ṭantirh lamah a awl a, chutihrualin tun season inelna hrang hrangah match 15 inlan leh tawh mah se goal thum chiah a la khung.

English forward hian October 30-a Spurs laka goal a khung hnuah goal a la khung leh lo a, match 11 chhung goal a khung tawh lo. Man United tlarhhma bil chhan zinga miah a ngaih theih.

Rangnick erawh Rashford hi a chhan. Man United manager lailawk chuan, "Marcus hian training-naah theihtawp a chhuah. Striker tan chuan goal khung a pawimawh a, ani tan pawh goal khung chu a ṭha ngei mai. Mahse kei chuan theihtawp a chhuah chhung chu a pawina ka hre lo," tiin a sawi.