Spanish Super Cup: El Clasico-in min hmuak
Saudi Arabia-in football khawvela match 'hot' ber pawl a thleng dawn a, zanin dar 12:30 hian Barcelona leh Real Madrid ten Supercopa de España semifinal chu Riyadh khawpuiah an khel dawn.
Lei ba ngah vanga talbuai, khelmuala result duhawm nei thei chuang lo Barca tan Spanish Super Cup hi team boruak tih ṭhat nan a ṭangkai ang tih a hriat a, zaninah Barca hian chak loh an duh dawn lo.
Chutihrual chuan Carlo Ancelotti enkawlna hnuaiah Real Madrid-in nasa takin hma an sawn a, Spanish football-ah ro an rel mek tia sawi ngam a ni.
Real Madrid a kir leh hnua nomawi la chawi lo 'King Carlo' tan Spanish Super Cup hi champion hmahruai atan hman theih a ni a, Italian coach-in kut ruaka Saudi hawsan a tum lo tawp ang.
Inelna chu
Kum 2018 thleng kha chuan Spanish Super Cup hi La Liga champion leh Copa del Rey champion inkara khelh ṭhin a ni a, mahse, Spanish football thuneituten sum an zawnna lamah inelna kalphung an thlak danglam.
2019-20 aṭang khan inelna hi team pali inelnaah thlak danglam a ni a, Copa del Rey finalist pahnih leh La Liga champion leh pahnihna ten Spanish Super Cup nomawi chu knockout tournament angin an khel ṭhin.
Barcelona leh Real bakah hian Atletico Madrid leh Athletic Bilbao an inlan dawn bawk a, anni pahnih hi semifinal lehlamah, Ningani zan dar 12:30 hian Saudi-ah vek an intawng ang.
Barca leh Bilbao hi Copa del Rey finalist an nihna anga inelna hmachhawn tur an ni a, Atletico hi La Liga champion lai niin Real erawh season hmasa khan pahnihna an ni thung.
Saudi ber kher?
November 2019 khan Spanish Super Cup hi team paliin an khelh tawh tur thu puan a ni a, hemi rual hian Saudi Arabia-in kum thum chhung an thlen tur thu puan tel a ni bawk.
Saudi hian season thum chhung Spanish Super Cup thleng tur hian euro maktaduai 120-in an chhang a, Spanish FA tan chuan Saudi-a Spanish Super Cup nghah hi sum lamah chuan hlawkna ropui tak a ni.
2019-20 khan Spanish Super Cup hi Saudi Arabia-ah khelh ṭan a ni a, King Abdullah Sports City, Jeddah chuan inelna hi a thleng.
Nikum lamah erawh hripui vangin Saudi-ah inelna hi neih theih a ni lo a, Seville, Spain-ah inelna hi neih niin Athletic Bilbao chuan Barcelona an hneh a, an champion - tun season-a semifinal match hnih leh final hi King Fahd International Stadium, Riyadh-ah khelh vek tur a ni ang.
Tichuan...
Saudi Arabia an vannei a, El Clasico an thleng dawn - Lionel Messi leh Cristiano Ronaldo awm tawh lo mah se club pahnih inhalna erawh a la pangngai reng a, Barca-in coach atana Xavi an nei let ta hi El Clasico boruak ti 'hot' tu a tling pha.
Catalan club-in thlasik transfer-ah pound maktaduai 40 chuang sengin Ferran Torres an lalut a, Spanish forward hi inelna neih hmaa an ziah luh hman avangin an chhawr thei dawn - mipui mit fukna tur a ni ang.
Barca president Joan Laporta-a'n Torres an lakluh hnuah, "Barca kan lo kir leh ta," tiin vantlang hriatah a sawi a, Catalan club chu manganna khur ruam aṭanga an thawh leh mek thu a sawi.
Mahse, football chu sawi tur ni loin khelh tur a ni - club president thusawi dik tawk leh tawk loh a hriat thuai dawn a, Barca hian Real an hneh thei a nih ngat chuan team boruak chhia siamṭhat an tum mek chawi kang tu atan a ṭangkai khawp ang.
Barca an dam
Catalan club-in Spanish Super Cup khel turin Torres bakah Pedri an chhawr theih tur thu a chiang a, player pahnih hi a tirah squad-ah telh ni lo mah se tunah chuan Covid-19 test thlengin an paltlang tawh a, Barca tan anni pahnih chhawr theih hi thawk huaina tham a ni.
Hliam vanga chawl reng Pedri hi kum thar rual khan lo kir thei tura ngaih a ni tawh zawk a, mahse, hripui a kai avangin a inkhunghrang leh a, tunah chuan negative result nen Saudi a pan ve thei ta.
Torres pawh Xavi-a'n Barcelona tana a match hmasa berah Real Madrid hmachhawn tir a duh nia sawi a ni a, Catalan club tan zaninah a inlan nghal a nih pawhin thil mak a ni lo ang.
Barcelona hian Ronald Araujo, Frenkie de Jong leh Ansu Fati an chhawr thei dawn bawk a, Catalan club-in an ṭhat dan bera Real an hmachhawn theih dawn avangin Spanish Super Cup final an mitthla ngeiin a rinawm.
Real an ṭha
Ancelotti enkawlna hnuaiah Real an vul a, La Liga-ah point ngain hma an hruai mek - anmahni hnaih bertu Sevilla aiin match khatin an khel tam thung a, champion beiseina an nei sang hle.
Italian coach-in Mariano Diaz leh Gareth Bale tih loh zawng player a chhawr theih tur thu a sawi a, Real-in an ṭhat dan berin Barca an hmachhawn dawn tihna a ni a, a hmuhnawm loh ring suh.
King Carlo thusawi a dik a nih chuan tlarhmaah Karim Benzema, Marco Asensio leh Vinicius Jr te an inkawp thei ang a, Barca tlarhnunga Sergino Dest, Gerard Pique, Clément Lenglet leh Jordi Alba te tan hna a hautak dawn tihna a ni.
Benzema hian tun season-ah match 25 khelin goal 22 a khung tawh a, Asensio hian match 22-ah goal sarih a khung a, Vinícius hian match 26-ah goal 14 a khung tawh thung - an tawh a khirh ang.
Intawnna hmasa
Tun season-ah team pahnih hi league-ah an lo intawng tawh a, Real Madrid-in Nou Camp-ah ngei 2-1 in Barcelona an ngam - Barca goal awmchhun hi lung ṭha lo vanga inkhelh chawlhsan ta Sergio Aguero khung a ni.
Team pahnih intawn hmasak thlir chuan Real an chungnung zawk a, zaninah pawh Catalan club an lo hneh tawh tih hre reng chung hian an inlan dawn.
Mahse, Barcelona hian coach Xavi an nei tawh a, Ronald Koeman thlaktu hian player a nihna angin ropui takin El Clasico-ah hnehna a lo chang fo tawh a, coach a nih hnua Real a hmachhawn hmasak berah tlawm a duh lo ang.
Xavi hian Barcelona a enkawl hnuah match 11 kaihruaiin vawi nga hnehna a chanpui a, vawi li draw result neiin vawi hnih an tlawm - Xavi tan bul ṭan dan duhawm tia sawi chi a ni lo a, Real a hneh erawh chuan chawimawiin a awm lehzual dawn.