Bengaluru-in Mumbai an barakhaih!

Indian Super League-ah beisei loh reuslt kan hmu leh ta - Thawhṭanni zan khan Bengaluru FC chuan 3-0 in Mumbai City an hneh a, he result hian Kerala Blasters chuan table chung ber an luah chhunzawm.

Bangalore club tan Danish Farooq chuan minute riatna lekah goal hmahruai khungin a team hi hma a hruaipui a, Mumbai lamin an chhanlet leh mai rinna lian viau mah se rin loh zawk Bengaluru an langsar.

Chawlhlawk hman hmain Prince Ibara chuan goal hnih a rawn khung ve leh a, Congo international hian rintlak a nihzia a pholang - hun tawp thlengin goal dang a lut tawh lo a, 3-0 in Bengaluru an chak.

Bengaluru hian season bul ṭan nana an match hmasa berah NorthEast United hneh mah se a hnu match sarihah chak an nei leh tawh lo a, an talbuai hman.

Mahse, tun hnaia an match pathumah tlawm an nei lo a, Mumbai an sawp leh ta bawk - Bengaluru tan playoff khelh phak beiseina a vul thar leh a, champion an sawi ri ṭan leh tawh ang.

Hetihlai hian Mumbai City erawh an chak lo rei ta - an match hnuhnung pangaah an chak zo lo vek a, league match 11-ah goal 22 khungin khung hnem ber ni mek mah se an lamah vawi 20 a lut a, tlarhnung lam inbihchian an mamawh.

Mumbai tan Laleng-mawia'n inkhel bul a ṭan a, minute 90 khel tluan mah se mualphona lak ata a team a chhanhim zo chuang lo.

Hetihlai hian Indian chhuanvawr Sunil Chhetri erawh season a hmang fuh thei lo - Mumbai lakah pawh bench aṭanga luhtir a ni a, goal a khung thei lo tluang zel.

Kum 37 ni ve tawh Chhetri hian Bangalore club tan tun season-ah match 11 zet khel mah se goal khung a la nei a, ISL-a Indian player goal khung hnem ber hian a team chhanhim turin goal khung ṭan a mamawh leh tawh.