Italian Super Cup ; Inter Milan mualah Juventus

Serie A champion leh Coppa Italia champion ten an khelh ṭhin Italian Super Cup chu zanin dar 1:30 hian khelh a ni dawn. League champion Inter Milan leh Juventus ten nomawi an inchuh dawn a ni.

Tun hnaiah Super Cup hi ram danga khelh chang an nei, kuminah erawh San Siro-ah khelh a ni dawn. An inkhelhna tur hi Inter Milan khelmual a ni a, an tan boruak hip a nuam deuh bik ngei ang.

Juventus hi Super Cup-a record nei ṭha ber an ni a, vawi kua an champion tawh. 2019 khan Lazio an ngam lo a, nikum khan nomawi hi an la let. Inter erawh an champion hnuhnung ber chu 2010 daih tawh kha a ni.

Intawn tawhna
Italian club ṭha pahnih hi vawi 257 an intawnna tur a ni dawn a, Milan khawpui behchhana din Inter hian record nei ṭha zawkin vawi 114 an chak tawh a, ṭum 78 an tlawm thung - vawi 64 chu an inhnehtawk a ni.

Inkhel tam tawh viau mah se Super Cup bikah chuan vawi khat chiah an la intawng, 2005 kha niin Inter Milan hi 1-0 in an chak; a vawi hnihnaah pawh chak nawn an tum ang. Serie A bika an intawn hnuhnung ber chu nikum October kha niin 1-1 in an inhnehtawk.

Serie A table-ah Inter hian hma an hruai mek a, an khingpui tur Juventus erawh pangana an ni thung. Team pahnih inthlauhna hi point 11 lai a ni a, season an hman dan thlir chuan Inter hi rinkai zawk an ni a, mahse Old Lady hian an chung en hauh lo ang.

Chiesa a hliam
Juan Cuadrado leh Matthijs de Ligt te an hrem a, tuna thu thar berah chuan Federico Chiesa pawhin Super Cup hi hliam vangin a khel thei dawn lo. Italy international hi league match an khelh hnuhnung berah a khup vei lam a hliam.

Chiesa awm lo tur hi Juve tan chuan channa nasa tak a ni dawn, winger Cuadrado a awm loh bawk avangin tlarhma lam rem dan an siamṭhat a ngai dawn a, tlarhnung laia khel ṭhin De Ligt awm lo tur pawh a hmun ruak a zau ang.

Juve manager Massimiliano Allegri chuan, "AS Roma lakah 4-3 in hnehna kan chang thei a, chak mah ila kan khelh dan kha a la nghet ṭha tawk lo hle. Super Cup hi kan la leh thei a nih chuan Bianconeri tan kum bul ṭanna duhthusam a ni thei ang," a ti.

Allegri naute hian season bul ṭan fuh lo mah se an insiamrem ve zel a, tun hnai inelna hrang hranga an match hnuhnung pariatah tlawm an nei lo. Season hmang ṭha Inter hi an hlau dawn bik lo, an khelh fuh phawt chuan chak thei turin an squad a chhah tawk.

Inter inringtawk
"Chawl hman kan ni lo, kan hma a tih tur awm chu kan hlen chhuak zel tur a ni ang. Kan elpuite pawh an chawl lo, chuvangin hmalam pana kan kal zel a ngai," tiin Inter Milan manager Simone Inzaghi-a'n Lazio an hneh hnuin a sawi a, zaninah pawh chak an tum ang.

Antonio Conte leh Romelu Lukaku ten an chhuahsan khan Inter hi tlahniam tura ngaih an ni. Mahse, manager Inzaghi-a'n hun rei lote chhungin team a siamrem thei a, Nerazzurri fans lam pawhin an striker leh coach hlui hi an ngai rih lo.

Inter an kaltluang a, chutih rualin nomawi chawi turin an ṭha tawk em tih chu fiah an la ni lo, an tan zanin hi fiahna hmasa a ni dawn. Inzaghi naute hian Juve hneh a nomawi an chawi thei a nih chuan inrintawkna an nei sang leh zual dawn, inelna dangah pawh a ṭangkai ngei ang.

Hliam leh hrem vanga khel thei lo tur an nei lo a, an ṭhat dan berin an inrem thei dawn tihna a ni. Ivan Perisic, Lautaro Martinez leh Edin Dzeko te inkawp lo dan tum hi Juve tlarhnung tan hna hautak a ni ngei ang tih a chiang.