Barca-in Ferran Torres an ziak lut thei ta

La Liga club Barcelona chuan Manchester City aṭanga an lakluh Ferran Torres chu an squad list-ah an ziak lut thei ta a, Catalan club hian Torres an ziah luh theih nan hian chhuak tura an duh zinga mi Samuel Umtiti chu contract thar an pe!

Lei ba ngah vanga thununna tuar mek Barca hian an player hlawh an tihhniam emaw, an inhralh ṭhen phawt emaw a nih loh chuan player thar lalut thei mah se an squad-ah an ziak lut thei lo.

Hei vang hian chhuak tur anga sawi thawm awm reng Samuel Umtiti chu June 30, 2026 thleng atan contract thar pein a hlawh an tihniam thung a, Umtiti hlawh tihhniam avang hian Torres an ziak lut thei ta a ni.

Barcelona chuan, "Club tana a inpekna avangin Umtiti chungah lawmthu kan sawi a ni," tiin thuchhuah an siam a, Torres ziah luh a nih theih nana French centre back inpekna chu an fak.

Valencia aṭanga inzir chhuak Torres hian kum 2020 khan Manchester City a zawm a, match 43-ah goal 16 khungin Premier League leh League Cup-ah te champion nomawi a chawi hman a, Champions League final a luhpui bawk.

Mahse, English football-ah thla 18 chiah hun a hmang hman tihin Catalan club an lo lang a, Spain international hian an ram club sawmna hnar zo loin Spain-ah a kir.

Barcelona hian Torres hi pound maktaduai 46.3-in an lei a, heta pound maktaduai 8.3 hi chu a khelh ṭhat dan a zira pek belh tur a ni thung - Catalan club hian tun hnaiah loan tam tham tak an la a, hei vang hian Torres hi an lei theih phah.