Sabalenka a che fuh thei rih lo

Hmeichhe tennis world number 2 Aryna Sabalenka a che fuh hlei thei lo. Tun season inelna pahnih an hmachhawn tawhah chak ni hmel a la hmu lo, nimin khan Adelaide International khelin a tlawm leh nghal.

Sabalenka hi world number 395 Rebecca Peterson lakah nuamsa taka chak tura rinkai a ni, mahse set thum an khelh hnuah 5-7, 6-1, 7-5 in a chak lo. Kar hmasa khan world number 100 Kaja Juvan hneh loin a match hmasa berah a lo mualpho tawh bawk.

Belarus nula Sabalenka hian double faults rinngawt pawh vawi 21 a nei, tih sual a nei hnem lutuk hi a tuar. Hnehna changtu Peterson hian a match lehpekah chuan Anastasia Potapova hnehtu Madison Brengle a hmachhawn leh ang.

Kum 23 mi Sabalenka chuan, "Zep thu a cheng lo, tennis ka khelh tawh china a ṭha lo berte zinga mi a ni," tiin darkar hnih leh minute 18 chhunga a chak loh chungchang a sawi a, a khingpui Peterson tan erawh match ṭha tak a ni.