Second round-ah Sindhu a lut

Nimin khan Indian Open khelh ṭan a ni a, champion tura rinkai PV Sindhu chuan amah ang bawka tualchhung player Krishna Priya chu straight game hmanga hnehin second round a in hlangkai nghal.

K.D. Jadhav Indoor Hall, Delhi-a inkhelah Sindhu hian a tir aṭangin harsatna a tawk meuh lo, 21- 5, 21- 16 in a chak. Olympic medal pahnih la tawh Sindhu hian a match lehpekah chuan Ira Sharma leh Doha Hany inkhela chak zawk a hmachhawn leh ang.

Season hmasa khan Sindhu hi a che ṭha tawk lo. Indian nula chuan, "Mahni ram ngeia inelna hmachhawn chu a nuam bik, kan chhehvela thil awm nen hian kan inrem nghal vek mai a ni," tiin ram chhunga inkhelh nuam a tih thu a sawi.

Sindhu chuan sawi zawmin, "Hri leng vangin kan inkhel tam tawk lo vek, a bik takin nikum khan ka inkhel tlem hle. Tournament kan khelh tlem chuan inrintawk a harsa, tun ṭumah pawh khan a tirah chuan ka zam ve deuh," a ti.

Nimina hmeichhe first round inkhel dangah India nula Ashmita Chaliha chuan Russian player Evgeniya Kosetskaya chu 24-22, 21-16 in a hneh, seeded pangana hnehtu hian Yaelle Hoyaux a hmachhawn leh ang.

Indian Open-ah hian mipa singles player B. Sai Praneeth chu hri leng a kai avangin a inlan thei lo, tualchhung player zinga inhnukdawk hmasa ber a ni. Kidambi Srikanth chu India tana medal beiseina langsar a ni ang.

Tournament-ah hian lawmman atan $400,000 (Rs 2,95,61,400) sem a ni dawn.