AFCON: Vannei takin Senegal an chak

Africa khawmualpuia ram leh ram, football hmanga an inelna ngaihhlut hlawh tak AFCON chu khelh chhunzawm zel a ni a, Senegal chuan an match hmasa berah 1-0 in Zimbabwe an hneh hram.

Senegal tan Sadio Mane chuan hun pek belh minute sarihnaah inkhela goal awmchhun hi penalty hmangin a khung a, Zimbabwe tan chhanletna tur hun a awm tawh lo a, an vanduai takzet.

AFCON inkhel ngaihven hlawh zual zingah Morocco chuan 1-0 in Ghana an hneh a, Sofiane Boufal chuan inkhela goal awmchhun hi a khung.

A hming Mane
Liverpool-in ui tak chungin an thiampuipa Mane chu AFCON khel turin an kaltir a, Senegal tan Liverpool forward hi chhandamtu a ni. Senegal hian Covid-19 vangin captain Kalidou Koulibaly leh Chelsea keeper Edouard Mendy an chhawr thei lo a, an ṭhat dan berin an inlan lo.

Heti chung hian inkhel ṭantir aṭangin Senegal-in an nawr nghal a, an vanneih zan ni se injury time nghah thlen ngai lo tur a ni - Mane ball pek duhthusam Paris St-Germain midfielder Gana Gueye-a'n holam taka a khung theih lohte chu uiawm a tling a, Mane pawhin chance hlah a nei nual bawk.

Zimbabwe tan goalkeeper Petros Mhari a che ṭha a, hun pek belha Mane penalty erawh a dang thei ta bik lo. Zimbabwe defensive midfielder Kelvin Madzongwe chuan a kutin ball a tawk fuh a, penalty a chawi a, Senegal-in chak nan an hmang zui.

Morocco an chak
Chelsea winger Hakim Ziyech chu Morocco squad-ah telh a ni lo a, an ram coach Vahid Halilhodzic nen an inhmuhthiam loh vang nia sawi a ni a, World Cup 2022 qualifier-a match an neih zawng zawngah pawh Bosnian coach hian an player neih ṭhat hi a ko duh lo.

Hakim Ziyech tel lo pawhin Morocco an buai lo a, goal khung tur erawhin an nghah rei a ngai ve hret - Sofiane Boufal chuan minute 82-naah inkhela goal awmchhun a khung a, Ghana tan insang mar leh turin a tlai hret tawh.

Morocco-in inkhel an thunun a, chak pawh an phu - chutihrual chuan keeper Yassine Bounou hnenah lawmthu sawi an ba. Sevilla keeper hian Genk midfielder Joseph Paintsil-a khung ngei tur nia lang chu ṭha zetin a dansak a, Morocco an him phah.

Inkhel dang
Thawhṭanni zan inkhel dangah Guinea chuan Malawi chu 1-0 in an hneh a, Liverpool midfielder Naby Keita captain-na hnuaia khel team tan hian Issiaga Sylla chuan minute 35-naah inkhela goal awmchhun hi a khung.

Kum 2010 hnua a vawi khat nana Nations Cup khel Malawi tan Yamikani Chester chuan hmahruaina goal khungna remchang nei mah se a chhawr thei lo a, Guinea tan keeper Aly Keita a che ṭha takzet - a dang hnem malh malh hle.

Gabon chuan 1-0 in Comoros an hneh bawk a, a vawi khat nana AFCON khel Comoros lakah hian Aaron Boupendza chuan minute 16-na lekah goal a khung a, goal dang lut tawh loin chak nan an hmang.

January 10, Thawhṭanni Zan
Senegal 1 - 0 Zimbabwe
SEN: Sadio Mane 90+7'

Guinea 1 - 0 Malawi
GUI: Issiaga Sylla 35'

Morocco 1 - 0 Ghana
MOR: Sofiane Boufal 82'

Comoros 0 - 1 Gabon
GAB: Aaron Boupendza 15'

Zanin Inkhel Tur
Tunisia 06:30 PM Mali
Mauritania 09:30 PM Gambia
Equatorial Guinea 12:30 AM Ivory Coast