MFA hnuai age group inelna hmachhawn turin Covid-19 vaccine lak a ngai

Mizoram Football Association Executive Committee chuan nimin khan meeting neiin football leh futsal inelna kalpui dan tur an rel. Sorkar danin a phal a, hri lengin a tihbuai loh chuan MFA-in football leh futsal inelna a buatsaih ang.

Hetihlai hian Mizoram Under 15 League erawh tleirawl/rawlthar Covid-19 vaccine la lo tana inkhelh buatsaih loh tura AIFF aṭanga MFA-in thu a hmuh angin kalpui theih a ni dawn lo.

DFA inelna
District Football Association hrang hrangte inelna neih chu MFA Special General Body Meeting-in a lo rel tawh angin duan fel a ni. MFA Cup chu March 2022 hian Saitual-ah khelh ni dawn a, Hnahthialah April 2022 hian Inter District Women’s Championship khelh a ni ang.

Kum 17 hnuai lam inelna Inter District Junior Boys pawh May 2022 hian Siaha khelh a a ni ang. AIFF thuchhuah angin age group intihsiakah (Inter District Junior Boys) hian Covid-19 vaccine vawi hnih la tawh chin chiah a tel theih dawn a, MFA chuan DFA hruaitute chu an naute vaccine laktir rang turin a hriattir a ni.

MPL Under 18
Mizoram Premier League Under 18 chu May 2022-ah kalpui tum a ni a, kum bithliah inelna a nih angin AIFF duh dan angin Covid-19 vaccine vawi hnih la tawh chin chiah a tel theih.

India ramah kum 18 hnuai lam tan Covid-19 vaccine pek ṭan mek a ni a, MFA chuan AIFF leh sorkar duh dan angin vaccine la lote chu inkhelh a phalsak dawn lo a ni.

Women's League & Veteran Football
MFA Women's League chu April 2022-ah neih tura ruahman a ni a, hri lengin a tibuai a nih loh chuan hmeichhiate tana inkhelhna hun hi siam ngei tum a ni a, MFA Women's Committee-in ruahmanna a lo siam dawn a ni.

MFA chuan tun season chungin kum upa zawkte inelna veteran football pawh kalpui ngei a duh a, hri lengin ziaawm lam a pan a nih chuan a kalpui dan tur lo duang turin MFA Veteran Committee kutah a dah.

Futsal inelna
MFA chuan tun season chhungin futsal inelna hrang hrangte kalpui ṭha a ti a, MFA Futsal Committee-in sorkar SOP leh hri leng dinhmunte thlir chungin futsal inelna kalpui dan tur ruahmanna an siam ang.

MFA Futsal Committee hnuaiah hian MFA Futsal League khel tura club 16 bakah Division One-ah club 62 an inziak lut tawh a, registration-te tihfel ni tawhin hun remchang hmasaah inelna buatsaih tum a ni ang.

Heng registered club-te inelna bakah hian MFA chuan veteran leh women's futsal pawh buatsaih a tum a ni.