Tennis League champion Zarkawt
Mizoram Tennis Association (MTA) hnuaia tennis inelna lian leh ngaihhlut ber 1st Aijal Club Challenger Tennis League chu Ningani zan khan khelh zawh a ni a, final inkhel hmuhnawm takah Zarkawt Xenons chuan K-12 Acers lakah 28-22 a hnehna changin an champion.
Aizawl Tennis Club-a final khelhah Zarkawt Xenons hian category paruk zinga pathumah hnehna an chang, men's singles, under 18 leh 35+ doubles-ah te chiang taka hnehna an chan avangin match hnuhnung bera open doubles khelh a nih hmain game sarih zetin hma an hruai fal hman a, nuamsa takin nomawi an chawi.
Tennis League
Tualchhung tennis inelna lian Aijal Club Challenger Tennis League-ah hian team panga–ATC Love All, Aizawl Acers, Zarkawt Xenons, Aijal Club Bulls leh K12 Acers te chu category parukah an in el a, league match an khelh kual hnuah a sang pahnihin final an khel.
Zarkawt Xenons leh K-12 Acers te hian league match li an khelh aṭangin point 125 ve ve an hmu a, an pahnih intawn tawhna bikah K-12 lamin 26-25 in hnehna an chang; final-ah erawh thawnthu ziah danglamin a awm, player ṭha rual inkhelah Zarkawt an dingchang a ni.
Match tinah category paruk zel khelh a ni a, heng category hrang hrangte hi a tirah khelh dan tur indawt siam a ni lo a, team captain ten an pawt ṭhin. Match tina an game lak zat hi belhklhawm zel a ni a, hei vang hian match zawng zawng a pawimawh vek – chutih rualin match ṭhenkhata an insawp nasat chuan match hnuhnung lamah chak zawk tur a chiang sa thei bawk.
Final chu...
Ladies singles aṭanga bul ṭan a ni a, league round lama hnehna chang tawh K-12 Acers tan R Sunkara chuan India women number 3 pawh ni tawh Shweta Rana chu 6-3 in an hneh nghal; K-12 lamin bul an ṭan fuh a, chutih rualin he category hi Zarkawt lamin an intawn hmasaka game an lak lohna a nih avangin beisei a bo bik lo.
Under 18 huangah India mipa ranking number 40 leh junior top 10 ni ṭhin Amit Beniwal chu Zarkawt team tan a rawn ding chhuak a, ani hian harsatna nei loin Vipul Mehta chu 6-1 in a sawp. Men's singles-ah ATP ranking nei phak, world number 1059 Jayesh H Pungliya-a'n Mehta bawk hi 6-1 thoin a sawp nawn–team pahnih inthlauhna chu game sarih a ni.
Mixed doubles-ah Basil Khuma leh R. Sunkara te ṭangdun chuan Mizoram mipa number 1 Innocent Lalrindika leh Shweta te chu 6-2 a hnehin, team pahnih inthlauhna chu game thumah an ti tlahniam. Mahse, 35+ men's double bikah Zarkawt lamin 6-2 ngawta hnehna an chan theih avangin, match hnuhnung ber Open doubles-a Basil leh a u David te hnehna chanin awmzia a nei phak tawh lo.
Xenons an lawm
Zarkawt Xenons team captain B. Lalruattluanga chuan, "League round lama kan chet fuh lohna ladies singles leh under-18 huangah hma kan sawn a, kan hneh loh tawh team an nih avangin hneh let ngei tumin hma kan la nasa hle," tiin Vanglaini a hrilh.
Ruata chuan Xenons neitu CS Laldawngliana leh organising chairman Sandeep Sharma chungah lawmthu a sawi a, nomawi an chawi theihna tura an thahrui pakhat 'fans' chungah thinlung takin lawmthu a sawi bawk.
Final Thlirna Tawi (Zarkawt Xenons-in 28-22 in hnehna an chang)
K-12 Acers Zarkawt Xenons
Match Category Player’s Score Player’s
No
1 Ladies Singles R Sunkara 6 - 3 Shweta Rana
2 Under-18 Vipul Mehta 1 - 6 Amit Beniwal
3 Men’s Singles Vipul Mehta 1 - 6 Jayesh H Pungliya
4 Mixed Doubles Basil 6 - 2 Shweta
R. Sunkara Innocent
5 35+ Doubles Denga 2 - 6 Sangtea
Mamawia Muanzela
6 Open Doubles Joseph 6 - 5 Amit
Basil Jayesh