Ozil-a thuchhuakin belhchian a dawl lo - Kroos

Real Madrid midfielder Toni Kroos chuan Germany tana a khelhpui ṭhin Mesut Ozil-a'n a chawlh thu a puan chungchangah thu belhchian dawl lo ṭan chhana a hman thu a sawi.

Arsenal midfielder Ozil hian July thla khan chi leh chi thliarna vangin ram tana inkhelh a chawlhsan thu a puang. Kum 29 mi midfielder chuan, ""Kan chak chuan German ka ni a, kan chak loh chuan pem lut mai ka ni," tiin a lungawi loh thu a sawi chhuak.

Kum 28 mi Kroos chuan, "Mesut hian ram tana khelh a phu a, tun aia ṭhaa thlahna neih pawh hi a phu. Amaherawhchu a chawlhsan dana a thu chhuak erawh a dikhlel deuh a ni," tiin a sawi.

Real Madrid midfielder chuan sawi chhunzawmin, "A thusawiah khan thil dik tam tak a awm a, amaherawhchu thu belhchiang dawl lo leh dik lo tam tak khan a hliahkhuh. Amah ngei pawhin national team chhungah leh DFB-ah chi leh chi inthliarna a awm lo tih chu chiang takin a hria ang," tiin a chhanglet.

Ozil hian ram tan vawi 92 inlan tawhin 2014 World Cup an champion theih nana player pawimawh a ni a, kum 2011 aṭangin fan-te chuan national team player of the year atan ṭum nga ngawt an thlang.