UEFA Super Cup ; Ronaldo tel lohna Madrid ngamtu Atletico

European Super Cup chu Nilaini zan khan khelh a ni a, Europa League champion Atletico Madrid chuan Champions League nomawi kawltu Real Madrid chu 4-2 a hnehin champion nomawi an chawi.

Cristiano Ronaldo leh coach Zinedine Zidane tel loin Real-in beisei an phak lo a, kum thum chhung a zawna Champions League nomawi chawitu team ang kha an ni lo - Atletico tan Diego Costa chuan goal hnih a khung a, Koke leh Saul Niguez ten goal khat ve ve an khung bawk.

UEFA Super Cup-a Madrid derby hmasa berah Real tana goal khungtu chu Karim Benzema leh captain Sergio Ramos te an ni a, Ronaldo hmun ruak luah zo an la awm rih lo!

Real-in a zawna European Super Cup ṭum thum chawi thei nih an tumna chu a thamral a, hnathawh tur tam tak la nei chungin Lopetegui a haw.

Inkhel chu

Lillekula Stadium, Estonia-a inkhelah goal hmu turin nghah rei a ngai lo. Ham rik a rik aṭanga second 49-na lekah Diego Costa chuan goal hmahruai a khung nghal a, Real an hawihai.

Coach thar Julen Lopetegui enkawlna hnuaia khel Real an hnufual reng lo. Minute 27-naah Benzema chuan si phurh sutna goal a tauh lut a, Gareth Bale siamsak a ni - goal dang lut loin chawlhlawk an hmang.

Minute 63-naah Atletico right back Juanfran chuan a kutin ball a khawihfuh a, penalty box a nih avangin penalty a chawi. Real tan captain Ramos a rawn pen chhuak a, defender tawnhriat nei ngah hian goal-a chantir turin harsatna a nei lo.

Costa-a'n minute 79-naah an si phurh a sut leh avangin extra time khelh a ngai a, minute 90 hnulam hi chu Atletico ta a ni tawh - Koke-a'n ṭha zeta a pet luh hnuah Saul chuan yard 16 vela hla aṭangin a volley goal ve leh a, Real an tlawm.

Ronaldo tel lohna

Khawvela footballer ṭha ber ang hiala mi tam takin an ngaih a nih miau avangin Ronaldo hming lamrik a ṭul leh ṭhin. Real-in an coach Zidane an chan ringawt pawh channa 'nasa' tak a nih tawh laiin pound maktaduai 99-in Ronaldo an chan leh a, Portuguese forward tel loin an tlarhma a hriam tawk lo.

Real hian Ronaldo hmunruak luah tur taka player lakluh an nei lo a, coach Lopetegui chuan Gareth Bale chu an innghahna tur a nih thu a sawi tawh. Zidane laka tla tlum lo player hi 'world class' ni mah se a inthawlhna tur pheikhawk bun ṭhintu hi season khata goal 40 chuang khung ṭhin forward a ni a, a awlsam dawn lo.

Hetihrual hian Welsh forward hi 'season tak tak' ṭan hma hauha Ronaldo hmunruak luah zo loa sawi erawh a la fuh tawk lo ang. Atletico lakah pawh goal khung lo mah se tlarhmaah Marco Asensio leh Benzema-te nen an in 'man' tih hmuh turin a awm a, league-ah pawh champion beiseiawm ber pawl an la ni reng.

Bale hian Benzema tan ṭha zeta a siamsak bakah a hun neih ṭhat chu Atletico keeper Jan Oblak chuan a dan sak bawk - Asensio-a'n hun ṭha duhawm vawi hnih ngawt a nei bawk a, Real tlarhma hi Ronaldo awm loh vanga ngaihthah theih an ni dawn lo.

Hmasawn tum Real

Real Madrid coach Julen Lopetegui chuan,"Kawng engkimah hmasawn kan mamawh a, kan tihsual te ber aṭanga a lian ber thleng khan siamṭhat kan tum vek ang a, hmasawn kan mamawhna lai zawng zawngah chuan rim takin kan thawk vek ang," a ti.

Lopetegui chuan inkhel thlirkirin,"Minute hmasa berah goal an rawn khung nghal a, kha kha kan beisei loh thil a nih avangin kan tan a awlsam tawh lo. Hun tam zawkah kha chuan team ṭha zawk kan ni a, mahse kan hun neih kan chhawr loh laiin anni erawh chuan an chhawr si," tiin an vanduai thu a sawi.

Atletico Madrid boss Diego Simeone chuan, "Hnehna chang turin kan vaiin kan thawkho a, Costa goal hmasa avanga kan phur laiin penalty kan chawi khan minti buai hman ṭhelh a, mahse kan si phurh kan sut leh meuh kha chuan kan inrintawkna kan nei let leh a ni.

"Real hi final pangaah kan hmachhawn tawh a, national-ah vawi hnih hmachhawnin international-ah vawi thum kan hmachhawn thung. Champions League-ah erawh kan la hneh miah lo a, mahse chu avang chuan kan khelh dan kan thlak lo," tiin Real hneh tuma ruahmanna hranpa an siam loh thu a sawi.

Inkhel Chhehvel
• Kum 2012 khan Europa League champion Atletico Madrid chuan Chelsea hnehin Super Cup an champion a, hemi hnua Europa League champion-in UEFA Super Cup-a Champions League champion an hneh leh hmasak ber chu Atletico-in Real an hneh hi a ni.
• November 2015 khan Rafael Benitez hnuaiah Real hian Barcelona hmachhawnin goal li an chhuah a, hemi hnuah tun hi match khata goal li an chhuah leh hmasak ber a ni.
• Michael Keeping chuan February 1948 khan Celta Vigo lakah Real chu goal li a chhuahpui a, Keeping hnuah Real manager, competitive match-a Real a kaihhruai hmasa bera goal li aia tam chhuah leh hmasa ber chu Lopetegui a ni.
• Costa-a'n second 49-na leka goal a khung kha UEFA Super Cup-a goal lut rang ber a ni a, Costa tan Atletico a kir hnua club competition-a goal hnih a khung leh hmasak ber a ni bawk.
• Benzema chuan match riat hnuah Atletico lakah goal a khung ve leh ta a, an ṭhenawm club lakah hian October 2015 kha a goal khung hnuhnung ber chu a ni.
• Ramos-a'n Atletico lakah goal nga a khung tawh a, Sevilla (6) tih lohah chuan an hmelma kumhlun club lakah hian goal a khung hnem ber.