Djokovic leh Dimitrov chak niah Zverev a tla

World number 1 hlui Novak Djokovic leh champion lai Grigor Dimitrov ten Cincinnati Masters third round an lut a, player langsar dang Alexander Zverev erawh a zinkawng a tawp thung.

Nimin zing inkhelah Grand Slam vawi 13 champion tawh Djokovic hi Adrian Mannarino lakah 4-6, 6-2, 6-1 in a chak lo. Serbian tlangval hian a match dawtah Grigor Dimitrov a hmachhawn dawn. Bulgarian star Grigor Dimitrov hi Cincinnati Masters champion lai a ni a, ani hian Mischa Zverev chu 7-6 (7-5), 7-5 in a hneh.

Kum 31 mi Djokovic chuan, "A nihna takah chuan ka khel ṭha bik lo a, set hmasa kan hloh pawh kha a mak lo. Mahse, set hnihnaah ka insiamṭha a, chona hautak tak ka paltlang thei hi ka lawm hle," tiin a sawi.

World number 3 Alexander Zverev erawh Robin Haase lakah 5-7, 6-4, 7-5 in a chak lo a, kar hmasa lawka Rogers Cup quarterfinal paltlang lotu hian beisei angin season a hmang ṭha lo - tun hnaia tournament pali a khelhah nomawi a chawi phak lo vek. Haase hian Bradley Klahn 6-4, 6-4 a hnehtu Pablo Carreno Busta a hmachhawn leh ang.

Inkhel dangah Marin Cilic chuan Marius Copil lakah 6-7 (4-7), 6-4, 6-4 in hnehna a chang a, Grand Slam vawi thum champion tawh Stan Wawrinka pawhin Japanese star Kei Nishikori chu 6-4, 6-4 in a hneh a, Australian tlangval Nick Kyrgios chuan inkhel inhnehtawk takah Borna Coric 7-6 (7-1), 0-6, 6-3 in a hneh bawk.