India cricket captain hlui a thi

India Test and one-day international captain hlui Ajit Wadekar chu kum 77 mi niin nimin khan a thi. Wadekar hian a nupui Rekha, a fapa pahnih leh fanu te a kalsan a ni.

Wadekar hi hun rei tak damlohna vangin a inenkawl tawh a, nimin khan Jaslok Hospital-ah hruai a ni a, Mumbai chhim lam damdawi-in an thlen chuan a thi tawh.

Kum 77 mi Wadekar hian test match vawi 37 chiah ram tan a khel chungin a hnathawh avangin India cricket-ah sulsutu zinga miah ngaih a ni a. Kum 1971 khan a kaihhruaina hnuaiah England leh West Indies te an hneh a, hei vang hian an dahsan phah hle.

Test career-ah Wadekar hian run 2,113 a siam a, hetah hian century vawi khat a tel. India tana ODI captain hmasa ber a ni a, amaherawhchu England lakah ṭum hnih a chak loh zawn nghal avangin 1974 khan a chawl. Wadekar hian 90's chhoah Mohammed Azharuddin captain-na hnuaiah India team manager hna thawkin 1996 World Cup khan semifinal an thlen pui.

Hemi hnu hian Wadekar hian selector chairman hna a thawk a, Lala Amarnath leh Chandu Borde tih loah chuan amah chiah hi Indian cricket-a captain, manager leh selector nikawp thei a ni.

Wadekar hian test century vawi khat bakah half century vawi 14 a siam a, kum 1967 khan infiammite chawimawina sang Arjuna Award dawngin kum 1972 khan Padmashri a dawng leh bawk. India rama cricket thuneitu sang ber BCCI, India prime minister Narendra Modi, India president Ram Nath Kovind bakah cricket hmanga hming chher Ravi Shahstri, Sanchin Tendulkar, Mohammad Azharuddin, Anil Kumble, Harsha Bhogle leh mi langsar tam takin an ui thu an tarlang.