Ram tana inkhel tawh lo tur Vitor Moses

Nigeria international Victor Moses chuan kum 27 mi chauh la ni mah se ram tana inkhelh a chawlhsan thu a puang a, "Ka hun tawn zawng zawng avang khan ka lawm a, hma hun atan duhsakna sang ber ka hlan che u a ni," tiin an ram team a thlah.

Chelsea winger hian kum 2012 khan Super Eagles (Nigeria sawina) tan a match hmasa ber a khel a, match 37-ah inlanin goal 12 a khung a, age level-ah England Under 21 tan a lo inlan ve tawh bawk.

Crystal Palace youth system chhuak winger chuan, "Super Eagles kawr ha chungin ka hun tawn duhawm ber ber chu ka tawng a, ka damchhung zawngin khang hun hlimawm te kha ka thinlungah hian a cham reng tawh ang.

"Mahse, tunah erawh he kawr hlipa ka club career lama hun tam zawk pek a hun ve tawh tih ka hria a, ka chhungkua tan hun tam zawk neih ka duh bawk a, ṭhangthar zawkte tan hmun ka kian dawn a ni," tiin a chawlh chhan a sawi.

Moses hian Nigeria hi kum 2013 khan Africa Cup of Nations-ah nomawi pathum a lo chawipui tawh a, 2014 leh 2018 World Cup-ah khan ram tan a inlan bawk.