FIFA ranking tharah France pakhatna
Nimin khan FIFA chuan ranking thar a tichhuak a, Russia rama World Cup chawitu France chuan pakhatna dinhmun an luah. FIFA chuan ranking siam nan June thlaa FIFA Council-in a pawm thar ranking formula thar a hmang.
Ranking tharah hian India chu 96-naah an awm a, Georgia nen an point hmuh zat a inang chiah. Blue Tigers hi ṭhenawm ram Myanmar, Nepal, Bangladesh, Sri Lanka leh Pakistan te lakah an sang fal hle.
Che ṭha leh ṭha lo
France-in kum 16 hnuah a vawi khat nan FIFA ranking-ah pakhatna dinhmun an luah a, he dinhmun an hauh hnuhnun ber chu May 2002 kha a ni. Amaherawhchu, Les Bleus leh anmahni hnaih bertu Belgium te hi point thum chauhin an inthlau.
Croatia, Uruguay, England leh Denmark te chuan World Cup-a an chet ṭhat rah sengin top 10-ah an invawrh chho a. Argentina, Chile, Germany leh Poland ten hmun an kiang. World Cup ṭan hmaa pakhatna Germany hi 15-naah an tla thla.
Mohamed Salah telna Egypt-in WC-a point an hmuh loh an tuar a, point 77 zet an paih a, ranking-ah pawh 65-naah an tla thla. Group stage paltlang lo dang Poland, Peru, Costa Rica leh Iceland te pawh an hnungtawlh vek.
Ranking formula thar
Hun rei tak chhung FIFA ranking formula thar zir chian a ni a, hetah hian an chakna leh chak lohna aṭanga an point hmuh (+/-) chu an point neih sa aṭanga belh/paih tur a ni. Formula thar hman hma chuan an point hmuh chu an point hmuh sa nen average lak ṭhin a ni.
Dan tharah hi chuan hun bi chhunga match nei lo pawh point paih sak an ni tawh dawn lo a, an point neih sa an nei chhunzawm dawn. Mahni aia ranking hniam nena an inhnehtawk emaw an chak lo a nih chuan point paih sak an ni dawn a, chutihrualin he danah hian inelna lian (entir nan FIFA World Cup) knockout inkhel a tel lo thung.
FIFA ranking thar hi September 20, 2018-ah puan leh tur a ni.
Rank Team Points
1 France 1726
2 Belgium 1723
3 Brazil 1657
4 Croatia 1643
5 Uruguay 1627
6 England 1615
7 Portugal 1599
8 Switzerland 1597
9 Spain 1580
9 Denmark 1580
11 Argentina 1574
12 Chile 1570
13 Sweden 1565
14 Colombia 1563
15 Germany 1561
16 Mexico 1560
17 Netherlands 1540
18 Poland 1538
19 Wales 1536
20 Peru 1535
21 Italy 1532
22 USA 1508
23 Austria 1502
24 Tunisia 1498
24 Senegal 1498
96 India 1242
138 Myanmar 1092
161 Nepal 1004
194 Bangladesh 904
200 Sri Lanka 888
201 Pakistan 884