Champion lai Muguruza a tla

US Open inbuatsaihna tournament langsar Cin­cinnati Masters khelh mek­ah hmeichhe singles champion lai Garbine Mugu­ruza chu last 16 paltlang zo loin a tla. World number 1 Simona Halep te inkhel erawh ruah sur vangin an zo hman lo.

Nilaini zan inkhelah Grand Slam vawi hnih champion tawh Garbine Muguruza chu Lesia Tsurenko lakah 2-6, 6-4, 6-4 in a chak lo, Tsurenko hi world number 45 ni lai a ni a, Spanish nula Muguruza erawh number pasarihna a ni thung - ranking zawnga chhut chuan an inthlau hle.

Kum 24 mi Mugu­ruza chuan, "Inkhel lung­chhiatthlak tak a ni. A awlsam lo tih chu ka hria a, chutihrualin ka beih let hram hram theihna kha ka lawm tho," a ti. Mugu­ruza hi Wimbledon second round-ah khan a tla a, inelna a hmachhawn leh hmasa berah beisei angin a khel chhuak chuang lo.

Inkhel dangah world number 1 Simona Halep leh Ajla Tomljanovic te an intawng a, an inhnehtawk hle. Set thumna an khel mek a; 4-6, 6-3, 4-3 a nih laiin Romanian nula Halep hian game ngana la thei turin 30-15 a hma a hruai mek laiin ruah sur vangin an khel chhunzawm thei lo.

US Open champion leh world number 3 ni bawk Sloane Stephens chuan Tatjana Maria lakah 6-3, 6-2 in hnehna a chang a, third round-ah Elise Mertens nen an inhmachhawn leh ang. Belgium nula Mertens hian world number 14 Rebecca Patterson chu 3-6, 6-2, 7-6 (7-1) in a hneh ve bawk.

Wimbledon champion Angelique Kerber chuan tun season chhunga match 40 a chakna a tawng. Ger­man nula Kerber hi seeded palina pek a ni a, a khingpui Anastasia Pavl­yuchenkova lakah set hmasa ber hloh mah se 4-6, 7-5, 6-4 in hnehna a chang a, seeded pahnihna Caroline Wozniacki erawh Kiki Bertens nen set khatna an khelh zawh hnuah a khup vei lam na vangin a inhnukdawk.