Emery hian hun a mamawh - Cech

Arsenal goalkeeper Petr Cech chuan an manager Unai Emery chungah dawhtheihna neih a ngaih thu a sawi a, manager thar hian a duh anga a naute khelh tir tur chuan hun a mamawh thu a sawi tel bawk.

Gunners hi Premier League-a an match hmasa berah champion lai Manchester City lakah 2-0 in an tlawm a, keeper thar Bernd Leno aia thlan zawk Cech-a'n goal hnih chhuah mah se City goal khung tur ṭha tak taka dan a nei a, chutih rualin a ball pet chhuah a fuh tawk loh bakah an mahni lamah a ti lut teuh hle bawk. Keeper lut zawk tur chungchangah Gunners ṭantute ngaihdan a phir mek - thutlukna siam tur erawh Emery a ni.

Kum 36 mi Cech chuan, "Team thar din tura hun neih a ngaih zia kan hriatthiam pui a ngai a, dawhthei takin kan nghah a ngaih chang a awm," tiin a sawi. Gunners hian tun kar tawpah Chelsea an hmachhawn zui dawn a, an chak lo leh a nih chuan an elpui dang te point ruk ngawta an thau theih tawh dawn avangin an hna a harsa tawh ang.

Maurizio Sarri kaihhruaina hnuaiah Blues-in bul an ṭan fuh thung, Italian manager hian a Premier League match hmasa berah Huddersfield chu 3-0 in a hneh nghal. Community Shield-ah Man City ngam lo mah se an insiamṭha chho ngalah a ngaih theih.

An match lehpek thlir nghalin Cech chuan, "A hautak dawn tih chu ka hria, mahse inbuatsaihna hun kan neih belh bakah, anni ai chuan Man City kha kan nawr thei zawk fe a ni," tiin Pep Guardiola naute an hmachhawn tawh danah team pahnih a teh a, an dinhmun a dah sang zawk.