Godin-a'n United a hnar chhan a sawi

August 9 zan khan Premier League nipui transfer bazar a tawp a, hemi ni tak hian Man­chester United chuan Atletico Madrid aṭangin Diego Godin lakluh an tum a, mahse kum 32 mi defender hian a hnar.

Uruguay international chuan United hming lam ri loin,"Sawmna tam tak ka hmu a, mahse mimal thil avangin Atletico-a cham zel ka thlang ta zawk a ni," a ti a, contract thar ziak anga an sawi chungchangah, "Ka contract erawh ka pawt sei lo. Kha thil kha khawi aṭanga lo irh chhuak nge a nih ka hre lo," a ti.

Godin hi a contract neihlai ang chuan pound maktaduai 18-a lei duhtu a hmuh chuan a chhuak thei ang, tih a ni a, mahse amah berin cham a thlang ta zawk a ni.

United-in tlai khawhnua Godin lakluh an tum chhan kha an beisei ber Harry Maguire an lakluh theih loh vang a ni. United-in pound maktaduai 65-a lakluh tuma an hel Leicester City defender hi club thuneitute chuan King Power Stadium-ah ngheh tir tumin contract thar an zawrh mek a, an beisei anga thil a kaltluang a nih chuan karkhata a hlawh £45,000 chu £75,000-ah tihsan a ni ang.