Liverpool thlaktu Klopp-a game 10

Premier League-ah Champions League hmun ruak an la inchuh laih laih laiin Liverpool chu an lo champion fel der tawh a, relegation battle ngaihnawm karah an champion thu an lo sawi ve reng bawk. 

Vawiina Liverpool hlawhtlinna ringawt en tan chuan Reds zinkawng hi kawng nuamsa angin a lang mai thei a, October 2015-a Klopp-a'n Liverpool enkawl hna a thawh ṭan ṭum thlirletna chang hre tan erawh a awlsam lohzia hai theih a ni lo. 

Premier League champion kalkawngah thinlung hliam, zahthlak taka tlawm leh thil tam tak a awm a, mahni player-te hmangaih taka kuah ṭhintu Klopp meuh pawh, "Mi kuahtu," tia fiamthu thawh nan hman a ni hial.

December 13, 2015 khan Anfield-ah Baggies an mikhual a, hun pek belh minute ruknaa Divock Origi goal hmangin an inhnehtawkpui hram. Klopp-a'n Baggies coach Tony Pulis chibai loin fans lam a hawi a, a awm a chum a, player-te chu fan-te hnena lawmthu sawi turin a ti. 

Hetihlaia Liverpool chet dan hi fiamthu thawh nan hman a ni a, Klopp hian Anfield-a club tenau inhnehtawkpui hi ropuinaah a ngai niin mi tam takin an ngai. Mahse, Klopp chuan, "Fan-te ṭangkaizia ka hria a, team khat kan ni tih pholan ka duh a ni," a ti a, Klopp-a'n fan-te nena inpawh zawkna a siam thar.

Liverpool 4-3 Borussia Dortmund (5-4 agg) 

April 14, 2016 a ni a, Europa League quarterfinal second leg-ah Liverpool-in Borussia Dortmund an mikhual a, inkhel pahnih belhkhawma 4-2 a an hnufual hnuin hun tawp lam minute 24-ah goal thum an khung a, Liverpool an chak daih!

Hetihlaia Anfield boruak ropuizia chu thua sawifiah chi a ni lo a, Klopp-a'n December thlaa fan-te pawimawhzia hriaa zahna chibai a buk kha a hlutna a lo lang chhuak - fan-ten Liverpool an pui tih theih a ni. Klopp chuan, "Goal kan khung khan stadium-ah thil thleng a awm tih chu mi zawng zawngin an hre thei ang. Suangtuahnaah a cham a, bengah a thang khawk a, a rim leng vel pawh ka hria," a ti!

May 21, 2017-ah Premier League season a tawp a, Liverpool chuan 3-0 a Boro sawpin Champions League khel turin an tling - pangana Arsenal aia an sanna chu point khat chauh a ni a, a hma kum ruk chhunga vawi khat chiah an khelh inelna an hmachhawn dawn. 

Klopp hian, "Kan ṭhuthmun chu ṭha takin kan rem fel ta a, season thar ka nghakhlel takzet a ni," a ti a, England legend Alan Shearer chuan, "Season tharah hei aia ṭha zawk hian an inlan ang," a lo ti ve bawk - a sawi sual lo chiang hle. 

August 12, 2017 khan Liverpool fan-ten an club chanchina hriatreng tawh tur player pathumin a vawi khat nana bul an ṭan ho an en a, Sadio Mane, Roberto Firmino leh AS Roma aṭanga an lakluh Mohamed Salah ten tlarhmaah bul an ṭan ho - goal an khung vek!

Mane-'n Liverpool goal hmasa ber a khung a, Salah penalty hlawhchhuah chu Firmino-a'n goal-ah a chantir a, Salah khung tur a siamsak zui. Season thum pawh tling lo an khelh ho chhungin player pathum hian goal 211(92 - Salah, 65 - Mane & 54 - Firmino) an khung tling der tawh. 

January 5, 2018-ah Liverpool-in pound maktaduai 75-a an lei defender manto Virgil van Dijk chu a vawi khat nen an inkhelhtir a, FA Cup third round-ah Everton hmachhawnin 2-1 in hnehna an chang - VVD hian minute 84-naah chakna goal a tauh lut. 

VVD hi fans lam hawia tlan nghalin Kop ho ngainat rawn a ni nghal. Hei mai a ni lo - Liverpool hian a zawm hma hian league match 23-ah goal 28 an chhuah a, Anfield-a pan hnua league match 14-a khelhah goal 10 chiah an chhuah - Lal thar a piang ta. 

May 26, 2018 khan Champions League final-ah Liverpool-in Real Madrid an ngam lo a, goalkeeper  Loris Karius chuan zahthlak khawpin tihsual pahnih a nei. Klopp-a'n world class goalkeeper ni thei tura ngaih hi thlak a ngai tih a hrethiam vat a, pound maktaduai 66.8 man Alisson a lalut zui - Brazilian keeper a lak fuhzia hrilh nawn kan ngai lo. 

Dortmund-in 2013-a Champions League final an luh hnuah khan German Cup an champion tih loh chu nomawi chawi an nei lo a, Atletico Madrid-in 2014 leh 2016-ah final lut mah se an chak zo lo a, a hnuah nomawi chawi an nei lo. Kum 2019-a final lut Tottenham Hotspur chu tun thlengin an la talbuai - Liverpool erawh Champions League leh Premier League-ah an champion zui. 

Reds-in Alisson leh VVD lalut turin world record hial siam mah se an tlarhnung ti famkimtu chu Andy Robertson leh Trent Alexander-Arnold tih loh rual a ni lo - Andy manah pound maktaduai riat an inseng a, Arnold hi anmahni chherchhuah a ni thung. 'Assist King' tih hiala hriat hlawh zui full back pahnihin match khata assist an neih ve vena hmasa ber chu November 11, 2018-a Fulham an hmachhawn kha a ni.

Arnold hian Salah khung tur a siamsak laiin Andy hian Xherdan Shaqiri khung tur a assist thung. Fulham laka assist an neih hmaa player pahnihin Premier League-a assist an neih zat belhkhawm chu pakua (7 - Andy, 2 - Arnold) a ni a, a hnuah erawh vawi 40 (23 - Arnold, 17 - Robertson) assist an nei tawh.

He game hi engtia hrilhfiah chi nge ni ang? "A ropui" tih bakin sawifiah a harsa hle. Nou Camp-a 3-0 a an tlawm hnuin Anfield-ah Reds hian Barcelona chu Champions League semifinal second leg-ah 4-0 in an lehthal a, Alexander-Arnold-a corner rang lutuk hmangin Divock Origi-a'n chakna goal a khung a nih kha - May 7, 2019 kha a ni. 

"Football-a comeback ropui ber a ni e," tiin mi tam takin an sawi a, Champions League 2005 final-a Liverpool comeback ropui nena khaikhin an awm bawk - kha game khan Reds player-te thinlungah huaisenna a tuh a, "Eng pawh ka ti thei a ni," tih rinna chu an rilruah tuhsakin an awm. 

June 1, 2019 a her chhuak a, Liverpool-in a vawi ruk nana European champion ni turin Tottenham Hotspur chu 2-0 in an hneh a, Klopp chuan, "Season hahthlak tak, ka suangtuah phak piah lama tawpna mawi tak hmanga khar chu a ni e," tiin an season hman dan a sawi.

Klopp hian June 1 hma hian Borussia Dortmund leh Liverpool-a final a luh hnuhnung parukah hnehna a chang zo lo a, Premier League-ah point 97 neia an champion zawh loh hlim a ni bawk - heti zat point nei chunga Premier League-a champion zawh loh hi a awm ngai lo. Mahse, June 1-ah meuh chuan vanduaina zawng zawng pawh an relh ru a, Klopp-a'n a phu ang ngeiin hnehna hlado a chham ve ta - khawvelin milian mutthlu Liverpool an tho ṭan, tih an pawm thlap bawk. 

Liverpool 3-1 Man City 

Premier League 2018-19 season-a Liverpool champion loh chhan lian tak chu January 3, 2019-a 2-1 a Manchester City an ngam loh kha a ni a, November 10, 2019-a herchhuah meuh chuan Liverpool-in phuba an la. Anfield-a inkhelah hian Pep Guardiola naute hi chak se chu Liverpool an phak lohna chu point thum chauh a ni ang. 

Mahse, Liverpool zawkin 3-1 in hnehna an chang a, City hi pathumnaah an tla thla a, Reds hi point kua laiin an phak lo zui. Hetihlaia Liverpool hnaih bertu Leicester City pawhin Klopp-a naute hi point riat laiin an thlau a, Liverpool an hawikir tawh lo. Match 18 chhung a zawnin an chak a, Watford laka rin loh taka 3-0 a an tlawm hma khan ni 422 chu ngam loh an tawng lo - mahse Watford laka an tlawm hian Reds hi Premier League champion tura ngaih sa an ni tawh. 

Premier League champion Liverpool boss Jurgen Klopp chuan an nomawi chu humhim tuma an ven loh tur thu a sawi a, "Season tharah nomawi hi humhim kan tum lo. Hlawh chhuak leh turin kan bei dawn zawk a ni," a ti. 

Liverpool hian nizan khan Manchester City an lenchilh a, he thu buatsaih laia an inthlauhna chu point 23 ngawt a tling - he thuziak i chhiar meuh chuan an inthlauhna hi a danglam leh tawh ang. 

Klopp chuan, "A tawp kan thleng tawh emaw tia ngaihtuahna kan sen chiah hian tlak leh lam kan lo hnaih tawh zawk tihna a ni, tih hi ka tawnhriat aṭangin ka hre tawh," a ti a, Premier League-a vawi khat champion-ah duhtawk a tum lo. German coach chuan, "Manchester City, United leh Chelsea te hi season tharah chuan team hlauhawm tak rawn ni leh vek tur an ni," tiin elpui hautak an neih tur thu a sawi. Klopp hian tun hnaiah Liverpool fan-te chu an khaw chanchinbu Liverpool Echo kaltlangin lehkha a thawn a, champion zana pawna chhuak chunga champion lawm te chu ina tawm hram hram rih turin a ngen. 

Liverpool-a hun rei zawk cham duh Salah 

Premier League-a Liverpool an champion theih nana tha thawhhlawk Mohamed Salah chu Real Madrid leh Juventus nen sawizawm ni mah se Egyptian forward chuan Liverpool-ah hun rei tak cham a tum thu a sawi. Salah hian kum 2017 khan Roma chhuahsanin Liverpool a zawm a, a lo hlawhchham tawhna Premier League-ah a hming a chher hle - Liverpool tan inelna hrang hrangah match 145 khelin goal 92 a khung der tawh a, Premier League leh Champions League nomawi a chawi tawh. 

Kum 28 mi forward chuan, "He hmunah hian ka hlim em em a, a chhehvel boruak te hi nuam ka ti hle. Liverpool-ah hian nuam titakin ka awm a, hmun dang nen a inan loh em avangin hun rei tak cham ka duh a ni," a ti. Salah hian July 2018 khan Liverpool-ah hian kum nga chhung cham turin contract thar a ziak a, Egyptian forward ṭawngkam aṭang chuan Liverpool tan hlauhthawn tur a awm lo.