Inter Milan-in goal an surtir

Nilaini zan Serie A inkhelah Inter Milan chuan table mawngphah luahtu Brescia chu 6-0 in an sawp a, an chunga awn Juventus leh Lazio te chu na takin league nomawi an la chuhpui ve zel.

Inter tan hian Ashley Young, Alexis Sanchez, Danilo D'Ambrosio, Roberto Gagliardini, Christian Eriksen leh Antonio Candreva ten goal khat ṭheuh an khung a, mikhual lam tan an mualpho hliah khuh thei an awm lo.

Antonio Conte-a'n player ṭhenkhat a dahṭha, coronavirus vangin thla thum chhung vel an chawlh a ngai a, league an khelh chhunzawm leh hnuah inhnaih tak takin match an khelh a ngaih ṭhin vang a ni.Milan Skriniar chu hrem a la ni a, Marcelo Brozovic chu bench lamah dah la niin Romelu Lukaku leh Christian Eriksen te pawh inkhel bul ṭantir an ni lo bawk. Alexis Sanchez leh Lautaro Martinez te chuan a vawi hnih nan league-ah inkhel bul an ṭan rual.

Brescia pawhin contract chungchang fel lo vangin Mario Balotelli leh Romulo te a chhawr thei lo. Italy international striker Balotelli hi a duh lam hawi turin an chhuah zalen tawh, club neitu lam chuan an lalut chu an inchhir thu an sawi hial.

San Siro-a inkhelah a tir aṭanga a tawp thlengin a khat mawi tawkin goal a lut. Minute ngana lekah Young chuan Sanchez-a siamsak chu a volley lut, Chile international forward hian penalty aṭangin an goal hnihna a chhuih lut 

zui bawk.

Manchester United captain hlui Young-a'n Danilo D'Ambrosio tan a siamsak a, Arsenal player hlui Sanchez-a freekick chu Gagliardini-a'n a khung. Bench aṭanga lut Lukaku goal shot chu dang mah se a per let hi Eriksen-a'n a khung. Eriksen hian hun tawp hma deuhin Candreva tan a siamsak zui leh bawk a ni.

Nipui bazar hmasa khan Sanchez hian Man United aṭangin Inter hi loan hmangin a zawm, a loan hun hi hmang zo tawh mah se season an la zawh loh avangin an pawtsei. Tun season tawp thleng chu San Siro-ah a cham chhunzawm dawn, an la nghet dawn em tih erawh a la chiang lo.

Antonio Conte chuan, "Goal ruk kan khung a, keimahni lamah a lut ve miah lo. Hetiang baka ṭha a khelh dan chu a awm leh tawh chuang lo ang. Point thum hmuh chaka tuihal player hmuh kha a nuamin sawisel tur a awm ka hre lo," a ti.

Inter hi season tir lamah an che ṭha a, league hmahruaitu dinhmun pawh an luah hman. Amaherawhchu season chawhnu lamah an zuih a, tun dinhmunah hmahruaitu Juventus an phak lohna chu point riat lai a ni - Media lamin Inter hi tun hnaiah na tak takin an sawisel.

Italian manager Conte chuan, "Mi ṭhenkhat hi chuan kan chanchin zawng zawng hi an hre duh lo, a ṭha lo lai eng emaw tlemte chauh hi an sawi lian ṭhin. Media lam pawh hian Inter leh player hi sawisel mai lo se, sawisel tur an duh a nih chuan keimah min bei rawh se," a ti.

Inkhel Results

Inter Milan    6 - 0    Brescia

Bologna    1 - 1    Cagliari

SPAL    2 - 2    Milan    

Hellas Verona    3 - 2    Parma

Lecce    1 - 2    Sampdoria

Fiorentina    1 - 3    Sassuolo