Chelsea mikhual tur Arsenal

Zanin dar 10:00 hian Chelsea khelmual Stamford Bridge-ah Arsenal chu Premier League khel turin an lenglut dawn a, manager thar pahnih Maurizio Sarri leh Unai Emery ten 'London Derby' an hmachhawn hmasak ber tur a ni.

Arsene Wenger thlaktu Emery-a'n a match hmasa berah champion lai Manchester City a ngam loh avangin point an la hmu lo, Italian manager Sarri erawhin Huddersfield hnehin point thum a nei tawh thung; Gunners tan fiahna lian a tling dawn a, Blues erawhin inringtawk takin mikhual an thleng thei ang.

Leno aiah Cech
Chelsea tana Premier League nomawi vawi li chawi tawh Petr Cech-a'n 2015 khan Arsenal a zawm a, tun nipui bazar lai khan Emirates Stadium-ah Bernd Leno a rawn luh avangin Cech dinhmun a derthawnga ngaih a ni.

Czech Republic international hlui Cech hian Man City lakah inkhel bul a ṭan a, goal hnih a chhuah. Gunners manager Emery chuan, "A khel kha a chhe lo, hruaitu ṭha a ni bawk. Inrinni zan atan chuan thutlukna siam harsa a ni lo, ani hian bul a ṭan leh ang. Cech ang bawkin Bernd chungah pawh rinna ka nghat bawk," a ti.

Inkhel tur thlir lawkin Spanish manager chuan, "Season hmasa ang loin Blues hi team thar an ni a, Man City nen an khelh dan pawh a inang lo hle. Kan mawhphurhna a sang dawn," a ti a, City nen an inkhelh dan anga khelh nawn a rem loh thu a sawi bawk.

Hliam leh dam
Man City lakah Arsenal midfielder Ainsley Maitland-Niles chu a ke hliam vangin lak chhuah a ni a, kum 20 mi Maitland-Niles hi October thla hma chuan an chhawr thei tawh dawn lo - ani bakah hian Carl Jenkinson (ke rek), Sead Kolasinac (khup) leh Laurent Koscielny (keartui) te chu Blues khelmualah an inlan dawn lo bawk.

Captain Koscielny leh tharum ngah Kolasinac awm lo hi Gunners tan buaina tling a, chutih rualin Spain international Nacho Monreal a khelh theih dawn dawn avangin buaina zualpui chu a fel tura ngaih a ni. Ani bakah hian Danny Welbeck pawhin team training a zawm pumhlum tawh.

Spanish manager Emery chuan, "Match hmasa berah khan kan tlawm lo, kan rilru leh khelh dan phung kha a chhe lo. Kan chak lohna chu thil dang a ni, inbuatsaihna kan neih ṭhat avangin hmasawn leh zualna hmuh tur a awm ang," tiin a sawi, league match hmasa berah chak lo mah se thawhchhuah theih a inbeisei hle.

Hazard a inpeih
World Cup khelh vangin Eden Hazard-a'n team training a zawm tlai a, Community Shield-ah a inlan loh bakah Huddersfield lakah inkhel bul a ṭan lo. Mahse, an league match hmasa berah hun tawp hma ninute 15 chhung khelhtir a ni a, Barcelona forward Pedro goal khung tur a siamsak.

Kum 27 mi Hazard hian tun kar chhungin ngawrh takin training a nei chhunzawm a, training-na hmunah goal mawi leh nalh tak tak a khung - zanin hian Gunners lakah inkhel bul a ṭan tawh ang.

Match hmasa zawka bul a ṭan loh chhan sawiin Sarri chuan, "Kha tih hunlai khan Eden kha minute 90 chhung inkhel turin a la inpeih lo, kan khingpuite an chauh hnua lut tur kha chuan a ṭha thung, tunah chuan a fit tawh," a ti. Belgium international hi Arsenal tlarhnung tana ven uluk bik ngai tur a ni.

Tlarhma bil
Alvaro Morata-a'n beiseina sang tak nen Real Madrid aṭangin Chelsea a zawm, Spanish striker hian nikum December thla hnuah Premier League bikah goal khat chiah a la khung a, World Cup khel tua koh zingah pawh a tel phak lo hial - Huddersfield lakah beisei a phak lo zui hle bawk.

France international Olivier Giroud a rawn kir tawh a, Arsenal striker hlui hian World Cup final hnuah match a la khel leh lo a, zanin hian a club hlui laka inkhel bul ṭan turin inpeih tawh mah se, Sarri tan 'risk' ngam a ni rih kher lo mai thei.

Morata leh Giroud ten Italian manager mit an tlung tawk lo a nih chuan Hazard hi tlarhmaah kheltir theih a ni a, ani thlawp tur hian ball thiam Pedro leh Brazilan winger Willian an la nei bawk - goal hmaah an ngaihtuahawm loh ang.