Casillas-a'n Porto a mangṭha

Spain tana World Cup nomawi chawi tawh goalkeeper Iker Casillas chuan season nga a chamchilh tawh FC Porto chu a mangṭha. Nilaini zan khan a contract neih lai chu a hmang zo fel chiah a ni.

Kum 39 mi Casillas hi nikum khan training an neih laiin heart attack vangin a buai a, damdawi inah enkawl a nih hnuah a dam leh. A natna hi dam leh mah se nikum April thla hnu lamah match khelh a nei leh tawh lo.

Portuguese club hian an team list-ah Casillas hming hi a ziak kai tho a, player bakah technical staff zingah a tel bawk. Squad-ah telh ni mah se a inkhel thei lo a, kumin February thla khan football a chawlhsan thu pawh a lo puang tawh.

Inkhelh chawlhsan mah se Porto lamin technical staff-ah an telh avangin a contract neih ang chu a hmang zo ta tho. Tunah chuan hun rei tak chhung a lo chamchilh tawh football mangṭhain nun kawng dang a zawh ṭan dawn niin a lang. Real Madrid keeper hlui hian July, 2015 khan Porto hi a zawm a, match 156 khelhsak hmain 2017-18 season khan league nomawi a chawipui a ni.