Asian Games-ah India infiammi 572

Asian Games 2018 chu vawiin tlai dar 5:30 hian a hawnna hun neih a ni dawn a, August 18 aṭanga September 2 chhunga neih tur he infiamna khawmpui lian hi Indonesian khawpui pahnih Jakarta leh Palembang-ah neih tur a ni.

India aṭangin infiammi 572 an inlan dawn a, infiamna huang 36-ah an tel ang. Hawnna inkhawmah hian fei khawh (javelin throw) thiam Neeraj Chopra chu India hnam puanzar kengtu a ni ang. India aiawh tur zingah hian Mizo nula Lalremsiami Hmar chu hockey inelnaah a inlan ang.

Women's Hockey World Cup khel zo hlim Siami chuan, "Kan huphurh hran lo, medal lak ngei tumin ram tan kan bei dawn a ni," tiin Vanglaini a hrilh a, Kolasib nula hian India tan medal vuak chhuak a tum hle - an match hmasa ber atan Pathianni zan dar 8:00 hian Indonesia an hmachhawn ang.

Kumin Asian Games-ah hian ram hrang 45 an inlan dawn a, infiamna peng hrang 45-ah inelna neih a ni ang, thupui (motto) atan "Energy of Asia" tih chu hman a ni ang.