Zaninah LBS Suzuki CYMA Basketball final Khatla Vs Khatla South
LBS Suzuki CYMA Basketball-ah champion thar an awm dawn a, zanin dar 8:00 hian R. Dengṭhuama Multipurpose Hall, Mualpuiah Khatla Derby hmuh tur a awm ang.
Ningani zan khan Khatla-in final thleng turin Bungkawn 89-82 in an hneh a, Khatla South-in Chawnpui 60-58 in an hneh ve bawk. Nomawi leh hmingṭhat inchuhna chauh a ni tawh dawn lo a, mahni veng ṭhenawm laka tlawm hrehawm zia hrechungin final an khel ang.
Champion thar
CYMA Basketball inelna hi ṭum ruk neih a ni tawh a, tun ṭumah hian champion tawh veng/khua panga Chanmari (2005, 2006), Saron Veng (2007), Republic Veng (2008), Champhai Vengthlang (2010) leh Tuikual South (2012) te inlan vek mah se quarterfinal thleng pha an awm lo.
Champion lai an tlak zawh tak avangin champion thar an awm dawn a, final-a inkhel turte hi inelna neih hnuhnun ber kum 2012 kha chuan basketball thiam veng tih tur la ni lo mah se tun ṭumah chuan team ṭha ber pahniha chhal theih an ni.
Khatla South hi...
Khatla South-in CYMA Basketball hma inelna hnuhnung ber Chawnpui-a an khelhah semifinal an thleng a, Ramthar lakah vanduai takin an chak lo.
Tun ṭumah hian semifinal thleng turin Khatla South-in Model, Durtlang, Vaivakawn leh Leitan te an hneh a, harsatna an tawk lo. Final khel tur inchuhnaah pawh bul an ṭan ṭha a, first quarter-ah Chawnpui lakah 23-10 zetin hma an hruai hman hial.
Amaherawhchu Khatla South team enkawltuten dinhmun siam nghet aiin player khelh kim a thlang a, Chawnpui erawh an ṭhat dan bera an khelh reng avangin third quarter zawhah 51-47 chauhin hma an hruai tawh. Quarter tawp berah Chawnpui che ṭha chhunzawmin minute nga chiah a awm tih chuan 56-53 in an lehthal. Hun tawp lam boruak sangah turnover a tam hle. Minute khat pawh a awm tlin tawh loh hnuah 58-58 in an inhnehtawk a, Lalnundika (Tom-a) basket hmangin Khatla South 60-58 in an chak hram.
Khatla ve thung
Khatla final kalkawng tluka harsa a awm lo, Tuikhualtlang, Armed Veng, Zotlang, Ramthar Veng leh Bungkawn te an hneh. An match hmasa bera an hneh TKT hi MSL4 MVP Lalrina Renthlei telna a ni a, Ramthar Veng hi champion rinkai an ni a, Bungkawn hi Vanlalṭhazuala leh R. Lalnunpuia te telna a nih avangin vanduai theihna vek an ni.
Khatla fiahna hautak zingah semifinal-a Bungkawn nena an inkhel hi a hmuhnawm ber ang hiala chhal theih a ni. Ningani zan inkhelah hian a tawp thlengin an inhnehtawk a, Eddie Zothanmawia (35 pts) leh Chuaudingliana (24 pts) ten basket an ngah a, Eddie hi rebounds lak kawngah a ṭangkai bawk. Khatla tan Vanlalnunsanga (Lan-a) tawnhriat a pawimawh a, a tawpah vanneih phu zawk an chak.
Final chu...
Khatla South-in fitness an nei ṭha zawkin a lang a, hei hi danglamna thlen turah a ngaih theih. Tawnhriat nei player Lalrinzuala Hnamte, Gospel Lalthanmawia leh Lalruatfela Hnamte te an lian ṭha a, chakpui tham an ni.
Heng tawnhriat player thlawp tur hian Tom-a leh Zonuntluanga (Puia) te shooting ṭha chu khingpui tana buaipui tham a ni dawn. Chawnpui an hneh ṭumin Michael Lalṭhakima'n point 14 a nei a, ven loha dah ngam a harsa ang.
Khalta hmachhuan tur ber chu Eddie-a a ni a, ani hi tun inelnaa che ṭha ber ang hialin a chhal theih. Eddie thlawp turin Khatla TBL tana a khelhpui Chuaa leh Republic VR4 player Zorinpuia te an awm a, Khatla-in player pathum lenna an hmang ṭangkai hle.
Team khaikhawmtu ber Lan-a pressure sangah a ṭangkai a, Brandon Vanlalhruaia'n inelna ṭha tak a hmang bawk. Khatla hian match nga an khelh tawhah point 80 an la hmu kai vek a, an average hi match tina 85.2 a nih avangin an inkhel a hmuhnawm ziah. Amaherawhchu champion tur chuan an squad a pan zawk avangin player an thlak kual thiam a ṭul ang.
A tawpah erawh danglamna thlen theitu chu mipui an ni dawn a, Khatla leh Khatla South te entu lamah an ṭan a ṭul dawn a ni.
Khatla
Second Round 92 - 75 Tuikhuahtlang
Round of 32 82 - 65 Armed Veng
Last 16 82 - 60 Zotlang
Quarterfinal 81 - 71 Ramthar Veng
Semifinal 89 - 82 Bungkawn
Khatla South
Second Round 72 - 48 Model Veng
Round of 32 72 - 62 Durtlang
Last 16 94 - 78 Vaivakawn
Quarterfinal 82 - 74 Leitan
Semifinal 60-58 Chawnpui