Thla thum chawl tur De Bruyne

Manchester City midfielder duhlai Kevin De Bruyne chu a khup hliam vangin thla thum chhung vel a chawlh ngai dawn, Belgium international hliam hi zai loha enkawl tur a ni thung.

Kum 27 mi De Bruyne hian Nilaini khan team training-na hmunah hliam a tuar a, 2015/16 season khan tuna a hliam tawrhna ngaiah hian hliam a tuar tawh a, thla hnih a chawl a, a hliam hmasa ai chuan a na hreta ngaih a ni.

Chelsea player hlui De Bruyne hi season hmasa khan Pep Guardiola kaihhruaina hnuaiah a khel ṭha hle, goal 12 a khung bakah a ṭhiante khung tur ṭum 21 a siamsak bawk. A khelh ṭhat em avangin World Cup-ah pawh an ram innghahna a ni phak, champion zo lo mah se pathumna niin an ram chu football bung thar a kai pui bawk.

Russia aṭanga an haw hnuah kar thum chawlh a nei a, hei vang hian Man City training a zawm tlai hret. Match hmasa bera Arsenal an hneh ṭumin bench aṭanga luhtir a ni a, match lehpekah chuan bul ṭan tura ngaih ni mah se hliam a tuar ta a ni.

Guardiola naute hian league nomawi chawi tumin thapui an thawh nghal a, Community Shield-a Chelsea an hneh hnuah Emirates Stadium-ah hnehna hlado an chham khum zui bawk - Pathianni zan dar 6:00 hian Huddersfield an mikhual ang.