Ronaldo hoin season ṭan a ni dawn

Italian Serie A 2018-19 season chu zanin aṭangin khelh ṭan a ni dawn, champion lai Juventus chu dar 9:30 hian Chievo khelmualah an lenglut ang - Turin club hian Cristiano Ronaldo an nei tawh a, nomawi an kawl lai humhim tumin thapui an thawh nghal tura ngaih a ni.

Ballon d'Or chawimawina vawi nga ngawt dawng tawh Ronaldo hian social media hrang hrangah follower maktaduai 313 a nei tling a, Portugal captain vang hian tun hnaia boruak nei sang lutuk lo Italian football hian mipui ngaihven a hlawh thar - thil chiang tak chu Serie A entu an pung dawn.

August 15 zan khan Genoa khaw chhunga 'Morandi bridge' a chim a, mi 39 lai an thi. He chhiatna thleng vang hian Italian FA chuan Pathianni zana AC Milan leh Genoa inkhel tur bakah, Sampdoria leh Fiorentina te intawng tur chu a hun a sawn a, match dang erawh a pangngaia kaltlang pui tur a ni ang.

Mipui lawm Ronaldo

Kum 33 mi a ni tawh a, a zawna season kua zet Real Madrid tan goal 30 a khung tlin ziah hnuah nipui barzar lai khan Juventus a zawm. Old Lady hian amah lakluh nan pound maktaduai 99.2 an hman bakah, kum tin pound maktaduai 27.7 an hlawhtir dawn.

Real Madrid forward hlui hian mipui lawm a hlawh a, fans leh jersey hralhna aṭang ringawt pawhin Juventus tan hlawkna a thlen ṭan der tawh. Juve bakah Serie A club dang tan pawh hlawk hle tura ngaih a ni. Match hmasa ber a khelhna tur Chievo chuan kar hmasa khan ticket an hralh zo vek tawh - anni hian season hmasa khan match khat bak ticket hralh zawh an nei lo!

Massimiliano Allegri naute hian a zawnin season sarih zet league nomawi an chawi thei a, kuminah pawh champoin tura rinkai an ni. Chutihrualin Serie A leh Coppa Italia ringawtah an lungawi lo ang; Champions League nomawi chawi an tum ang, an hna hmasa tur erawh ṭha taka league match khelh phawt a ni.

Nomawi a chiang lo?

Serie A nomawi hi tun hnaiah Juventus-in an ta neih a ni ber a, Premier League leh La Liga champion tawh Ronaldo an neih belh avangin club dang tan kawng a inhawng lo anga sawi a nih pawhin a mak lo. Amaherawhchu, Napoli leh AS Roma bakah Milan khaw club pahnihte chu Scudetto chuh buai thei tur an ni ang.

Season hmasa khan Napoli leh Juve an inum tawk hle a, a tawpah point liin Allegri naute an sang zawk; European league lian dang zawng aiin nomawi inchuh boruak a sangah a ngaih theih. Roma captain Daniele De Rossi chuan, "Nomawi chawi tur a chiang tawh," tiin Juve lakah pressure siam a lo tum ṭan der tawh.

Maurizio Sarri-a'n Napoli a chhuahsan a, amah thlak turin Carlo Ancelotti a lut thung. AC Milan leh Real Madrid tana UCL nomawi chawi tawh manager hian champion dan chu a hria a, Sarri team din ṭhat sa hmangin Juve a barakhaih a nih pawhin a mak lo ang.

Roma hian an keeper ṭha Alisson chu Liverpool lakah an chan a, fans an lawm lo. Mahse, player beiseiawm Justin Kluivert leh Ante Coric te bakah Javier Pastore leh Steven N'Zonzi te an neih belh thung, an player thar pali hi squad ti chak thei tur tak an ni.

Inter leh Milan

Inter Milan-in season hmasa bul ṭan ṭha viau mah se a laihawlah an che buai, season chawhnu lamah an tho chhuak tawh lo. Luciano Spalletti-a'n a squad a chhah tawk lo tih a hria a, Stefan de Vrij, Radja Nainggolan, Sime Vrsaljko leh Keita Balde Diao te an lei belh; captain Mauro Icardi leh winger ṭha Ivan Perisic an nei sa bawk a, an chhe lo hle.

Gennaro Gattuso kaihhruaina hnuaiah Milan-in hmalam an pan, mahse captain Leonardo Bonucci chu a club hui Juventus-ah a kir. Italian defender an chan avangin Milan fans an ngui a, chutihrualin tun hnai season nga chhunga Serie A striker hriam ber Gonzalo Higuain an nei; tlarhnung thuam chak nan Mattia Caldara an nei thar bawk.