Halep leh Keys an tlang

Cincinnati Masters khelh laiah world number 1 Simona Halep leh Madison Keys te chuan hnehna an chang a, Keys hian quarterfinal a luh tawh laiin, ruah sur avanga inkhelh hun sawn Halep erawh last 16 a in hlangkai chiah.

Ningani zan inkhelah Halep chuan Ajla Tomljanovic lakah 4-6, 6-3, 6-3 in hnehna a chang. Romanian nula Halep hian a khel ṭha vak lo, set hnuhnung berah hian 3-0 ngawtin a hnufual hman a, 4-3 in a san leh zawk laiin ruah sur vanga chawlh a ni - inkhel an chhunzawm leh hnuah game hnih lain a tlang. Nizan khan Ashleigh Barty nen an inkhel zui leh a, result kan hre hman lo.

Inkhel dangah Keys-i'n Angelique Kerber lakah vawi 55 ngawt winners vaw chhuakin 2-6, 7-6 (7-3), 6-4 in hnehna a chang. American nula Keys hian tun hmain Kerber hi a zawnin match ruk ngawt a ngam lo, tun

ṭumah erawh huaisen takin a khel a, a ball vuak na tak chu a chakna hmanrua a ni.

Wimbledon vawi hnih champion tawh Petra Kvitova chuan seeded pariatna Kristina Mladenovic lakah 6-4, 6-2 in hnehna a chang a, US Open champion Sloane Stephens erawh Elise Mertens hmaah 7-6 (10-8), 6-2 in a chak lo thung.