City el thei tur Liverpool - Scholes

Manchester United midfielder hlui Paul Scholes chuan Liverpool chu Premier League champion lai Manchester City elpha ber tura ngaih thu a sawi a, Jose Mourinho enkawl United chuan club chhung buaina chinfel an mamawh thu a sawi.

Scholes chuan, "Liverpool-in an mamawh em em goalkeeper an nei tawh a, Naby Keita neih belh bawkin ani hian match hmasa berah a khel ṭha hle. City erawh an ṭha dawn tih rinhlelh tur a awm lo a, Champions League lama an rilru an sen tam erawh chuan Liverpool hi a chhaih buai pha tur ber an ni," tiin United aiin an hmelma Reds a dah san zawk thu a sawi.

United legend Scholes chuan a club hlui chungchang sawiin, "Jose leh Paul Pogba inkarah hian eng buaina nge awm ka hre lo. Kan thil chhiar aṭang chuan dik lo chu a awm a ni. United hi che ṭha tur chuan Pogba hi a chet ṭhat a ṭul a, tunah rih chuan match liah vawi khat te a khel ṭha a, hei hi a tawk lo," tiin a sawi.

Manchester United hian Pathianni zan dar 8:30-ah Brighton & Hove Albion hmachhawn turin Falmer Stadium an tlawh ang.