Spanish La Liga ; A hun a thleng dawn ta

Spanish football season a inṭan ve dawn ta. Nizan khan Spanish La Liga match hmasa pahnih chu khelh a ni tawh a, mahse Barcelona, Real Madrid leh Atletico Madrid te an la inlan ve loh avangin ngaihven a la hlawh tawk lo.

Zanin dar 1:45-ah Barcelona chuan Alaves mikhualin an zinkawng an ṭan ang a, Pathian­ni zan dar 1:45-ah Real Madrid chuan Getafe an mikhual thung ang - Atletico Madrid erawh Thawhṭanni zanah an inlan ve dawn chauh.

Mizorama Spanish football entute tana thu hriat nuam lo tak erawh La Liga hi television channel-ah en theih a ni tawh dawn lo a, Facebook lamah live a thlir duh tan a en theih tawh chauh ang!

Tun hnaiah La Liga leh Face­­book-in inremna an nei a, Face­book hian season thum chhung atan India leh a chhehvel ramah La Liga hi live-in a pe chhuak ṭhin ang - La Liga official facebook page leh club inkhelte official page-ah a en theih ṭhin ang.

Barca leh change!

Barcelona captain Andrés Iniesta-a'n Japan lam panin top level-a khel thei a nih tawh loh thu a sawi a, Spanish midfielder thlak tura captain atana an thlan chu Lionel Messi a ni.

Argentine forward hian cap­tain armband hlan a nih zanah, "Kan tum ber tur chu Nou Camp-a Champions League hawn leh hi a ni," a ti a, La Liga an ngaihthah dawn tihna erawh a ni lo.

Barcelona hi season thum chhung chu a zawnin Cham­pions League quarterfinal

aṭanga pet thlak an ni tawh a, tun hnaia an buai chhan ber nia lang chu an squad chhah tawk lo hi a ni - statistics keuin hei hi a dik tih a chiang.

Catalan club player zingah Marc-Andre ter Stegen, Jordi Alba, Sergio Busquets, Ivan Rakitic, Luis Suarez leh Messi te chuan season hmasaah khan a tlem berah league match 30-ah ṭheuh inkhel bul an ṭan - Real player zingah league match 30-a inkhel bul ṭan tling awmchhun chu Casemiro a ni.

Tichuan...

Barcelona-in an squad chhah tawk lohna hi an hai bik lo a, coach Ernesto Valverde hoa Europe roreltu ni tel tur chuan player ṭha an inthlak kual ve reng a ngai tih an hria a, transfer bazar lamah pawh an buai hle.

Iniesta leh Paulinho ten chhuahsan mah se Malcom, Arthur leh Arturo Vidal te an nei thar a, pre-season a an chet dan leh player-te theihna leh thiamna thlirin Catalan club hi bazar lamah chuan an che fuh rih hle - season hmasa aiin an ṭha sawt ang.

Tlarhmaah ṭum dang ang bawkin captain thar Lionel Messi chu an chhuanvawr tur a ni dawn a, Luis Suarez leh Philippe Coutinho an awm dawn bawk avangin tlarhma lamah chuan ṭum dang ang bawkin Barca hi ngaihtuah an ngai lo!

Catalan club ṭantute tana thu hriat nuam em em tur chu Ousmane Dembele-a'n ngai a awh leh tawh nia lang hi a ni. French forward hi season hmasa khan hliam vangin a talbuai a, tun season-ah erawh Spanish Super Cup an chawi theih nan Sevilla lakah goal mawi bik a khung leh der tawh - en bik tur zingah a tel ang.

Real 'thar' chu

Real Madrid-in player thar an lak sawi vul chuk tur awm rih lo mah se an player thiam chungchuang Cristiano Ronaldo leh Champions League nomawi vawi thum chawipuitu Zinedine Zidane an chan miau avangin 'Real thar' tia sawi loh theih an ni lo.

Mahse, he 'Real thar' hian beisei an la phak rih lo - coach thar Julen Lopetegui hnuaia an competitive match hmasa berah La Liga lama an elpui tur Atletico Madrid ngam loin UEFA Super Cup-ah an tlawm nghal a, insiamṭhat an mamawh.

Spain coach hlui Lopetegui-a'n Porto-ah hun duhawm lo tak a hmang tih loh chu top flight league-ah tawnhriat a la nei lo a, Real a enkawl nghal miau bawk si avangin a tan hna a hautak dawn - tun thleng chuan kum 51 mi manager hian Zidane-a sulhnu a chhui zo ang em, tih hi zawhna a ni lo a, season tawp thleng a daih ang em tih chu zawhna awm a ni zawk.

Real hian tun thlengtin 'direct' a Ronaldo thlaktu tur an la la lo a, hming lamrik erawh an awm - Mauro Icardi (Inter Milan), Rodrigo (Valencia), Neymar & Kylian Mbappe (Paris St-Germain) leh Eden Hazard (Chelsea) te sawi an ni a, tu emaw ber an lakluh chuan team tan ṭhatpui tham ṭhah an ni.

Lopetegui duhthlanna

Real hian player thar an lak belh lo a nih pawhin an squad a chhah ṭha tawk a, coach Lope­tegui-a duhdan chu pre season aṭangin a hriat theih bawk - Spanish coach hian Gareth Bale chu Ronlado hmun ruak luahtu tur a nih thu a sawi tawh.

Lopetegui hian 4-3-3 forma­tion hman nuam a ti ṭhin a, tun dinhmuna a lan dan chuan Karim Benzema, Marco Asensio leh Gareth Bale chu tlarhmaa in­kawp tur an ni a, Isco chuan hmun pawimawh a chang bawk ang.

Kum 2013 khan European Under-21 Championship-ah Isco hi hetihlaia Spain U21 coach nen hian an lo inkawp tawh a, Spain senior team thlengin an inzui zui - kum 23 mi attacking midfielder hi Lopetegui-a player 'duh' a ni a, 'Isco disco' kan ti deuh reng a ni pawhin a mak lo ang.

Real hian goalkeeper thar Thibaut Courtois an nei tawh bawk a, Chelsea keeper hlui hian Keylor Navas a nek­chhuah ngei rinawm mah se European Super Cup-ah chuan Navas hi si ban nghaktu a ni - Lopetegui chuan Courtois hi league lamah chhawrin cup com­petition lamah Navas a chhawr dawn nia sawi a awm.