Damian Lillard a hlauthawng

NBA star Damian Lillard chuan inelna an neih chhunzawm leh turah player ṭhenkhat ten dan leh hrai zawm tur zawng zawng an zawm kim thei lo mai ang tih a hlauhthawn thu a sawi chhuak. Coronavirus vangin March thla aṭang khan NBA hi an chawl lailawk. July thla tawp aṭang hian July thla tawp aṭang hian playoff atan tling tawh leh la beisei thei chin team 22 chuan an khel chhunzawm dawn.

Inelna hi hmun hran hrana khelh kual a ni tawh dawn lo. Orlando bula awm ESPN Wide World of Sports Complex-ah inkhung hrangin hetah hian match zawng zawng an khel vek tawh ang.Portland Trail Blazers guard Lillard chuan, "Dan zawm tur an siam zawng zawng hi zawm kim thei ila chuan a himin a thlamuanthlak hle ang. Mahse mihring kan inang vek lo a, tun hmaa thil eng eng emaw thleng tawh ngaihtuahin kan fimkhur kim thei lo ang tih ka hlau.

"Amaherawhchu tun ṭuma hri leng leh a boruak hi chu a danglam, mi tu mahin midang hriselna nghawng chhei thei tur zawngin thil an ti duh lo turah ka ngai," tiin pakhat fimkhur lo zeuh an awm palh pawh a hlauh thu a sawi.

Inelna neihna tur hmun an pan dawn leh an thlen tirhah Covid-19 an kai em tih enfiah vek an ni dawn, a hmun an thlen hnuah darkar 36 aṭanga 48 chhung chu mimala khung hran vek tur niin, hemi hnuah hian endik nawn leh an ni bawk ang. Basketball inelna sang leh ngaihhlut hi regular season pawh an la khel zo lo, playoff hmanga conference champion an zawn hnuah NBA Finals an la khel zui leh dawn bawk a ni.