PSG-ah Germany U-21 captain

Paris St-Germain chuan kum 21 mi defender Thilo Kehrer chu Schalke aṭangin pound maktaduai 33-in an lalut a, Germany under 21 captain hian sea­son nga chhung atan Paris club tan contract a ziak.

Bundesliga club Schalke tana match 59 khel tawh Kehrer chuan, "European player tu pawhin Paris St-Germain tana khelh chakawm zia leh an ruahmana zinga tel hlut zia an hria ang, ka tan chuan he hmun aia hma­sawnna tur ṭha hi a awm thei lo ang," tiin a sawi.

Kehrer hian 2016 Feb­ruary thla khan Bun­desliga match hmasa ber a khel a, 2017 UEFA Under-21 Championship-ah khan an ram tan player pawimawh a ni. Schalke sporting director Christian Heidel chuan an player an hralhna zatah an lungawi thu leh, amah berin a duh­na hmun a pan vanga an lawmpui thu a sawi bawk.

Kehrer hi Schalke youth system aṭanga chhuak a ni a, amah chher chhuaktu coach Norbert Elgert hi Leroy Sane, Ilkay Gundogan, Manuel Neuer, Mesut Ozil leh Julian Draxler te pawh lo chher chhuak tawhtu a ni.

French champion PSG hian season thar an match hmasa berah Caen chu 3-0 in an sawp tawh a, zanin dar 8:30 hian Guingamp khelmualah an lenglut leh ang.