Anfield-ah Arsenal an lut dawn

Hripui vangin fans thawm awm loin hun eng emaw chen inkhelh a ngai a, tunah chuan hri leng karah pawh fans thawm hriat tur a awm - Anfield boruak pawh a nung leh tawh vet vet hle. Arsenal chuan League Cup semifinal first leg khel turin zanin dar 1:15 hian Liverpool an tlawh ang.

A tira ruahman dan chuan January 5, Nilainia khelh tur kha a ni a, mahse Liverpool lamin an dil angin first leg khelh hun hi an sawnsak. January 20, Ningani zan hian Emirates Stadium-ah second leg an khel ve leh thung dawn. Semifinal pakhat erawh khelh zawh a ni tawh a, nizan khan Chelsea leh Tottenham ten second leg an khel a, result kan hre hman lo.

A sawn chhan
Jurgen Klopp-a'n coronavirus a kai a, hri leng a kai vang hian Chelsea an hmachhawn ṭumin a team a ho thei lo. Alisson, Joel Matip leh Roberto Firmino te pawhin an khel thei lo, a hnuah player leh coaching staff zingah hri kai an awm thu an tarlang bawk.

Africa Cup of Nations khel khelin Mohamed Salah, Sadio Mane leh Naby Keita te an zin chhuak bawk a, darkar 48 chhung training ground an khar a ngaih avangin sawn an dil hi a mak hran lo a, an dil ang ngeiin phalsak an ni bawk.

Mahse, FA Cup an khelh zawhah Klopp chuan, "Covid-19 vangin kan buai a, kan player zinga hri kai nia kan ngaih tam takin an kai leh lo, false positive an lo ni. Positive tak tak chu Trent Alexander-Arnold chauh a ni, a bak zawng chu false positive.

"Amaherawhchu inkaihhruaina dan a awm, false positive pawhin match an khel thei lo," a ti. German coach thusawi aṭanga a lan dan chuan Reds player zingah hrikai tak an lo tam lem lo, zaninah chuan senior player an khel thei fur tawh ang.

Khelh dan tur
Salah, Mane leh Keita te an zin chhuak a, hliam vangin Thiago Alcantara leh Divock Origi te an chawl mek. Hripui kai Alisson Becker filhlim tawh mah se Caoimhin Kelleher-a'n si ban a nghah a la rinawm zawk.

Chak tur chuan tlarhnung phui a pawimawh ṭhin, club lian lo zawk nen FA Cup an khelh ṭumin Virgil van Dijk leh Ibrahima Konate te an inkawp a, Gunners lakah chuan Dutch defender hi Joel Matip nen an inkawp a rinawm.

Tlarhma player Salah leh Mane te hi thlak zo tur chu an nei lo, amaherawhchu German manager hian khelh dan phung nghet tak a neih avangin a naute a rem thiam ang tih a chiang a, tlarhma laiah Roberto Firmino a pawimawh dawn.

Brazilian forward bakah hian Diogo Jota an la neih avangin tlarhma lam chu an ngaihtuahawm lo. Keita awm lo bawk mah se Fabinho a dam a, captain Jordan Henderson a la awm cheu, anmahni khelmuala inkhel tur an nih avangin chak an tum ngam ang.

Arsenal midfield
Thomas Partey leh Mohamed Elneny ten Afcon an khel a, thlasik bazarah Ainsley Maitland-Niles-a'n AS Roma a pan; Granit Xhaka-a'n hripui a kai avangin FA Cup a khel thei lo tawh bawk, midfield laia khel tur an chaurau hle.

Mikel Arteta-a'n thiam takin midfield a siksawi a ngai dawn. December thla a khel ṭha tak Martin Odegaard chu ball semtu atan a hman a ngaih hmel a, a laiah Albert Sambi Lokonga nen an inkawp a rinawm.

Odegaard leh Lokonga te hmaah tlarhma pui turin Emile Smith Rowe a awm thei bawk ang, a lan dan chuan Gunners hian an duh emaw duh vak lo pawh ni se Liverpool lakah an sa huai neih an ser a ngai dawn - Reds pawh an indahṭha bik lo ang.

Smith Rowe a inlan a nih chuan mual sirah Bukayo Saka leh Gabriel Martinelli ten zalenna zau zawk an nei thei ang, striker Alexandre Lacazette nge Eddie Nketiah zawk inlan ang tih erawh hriatthiam a harsa rih hle.

A pawimawh
Season tirah khan Smith Rowe hi rinrawl a ni a, tun hnaiah erawh khelh dan phung thlakin Odegaard-a'n a nek chhuak tia sawi theih a ni. Arteta chuan, "Team tana a pawimawhna a la sang reng," tiin a sawi, mahse hmasawn a ngaih thu a sawi bawk.

Insiamrem an tum thu sawi zuiin Arteta chuan, "Hliam, Covid-19 leh Africa Cup of Nations vangin player chhawr theih loh kan nei nual, kan dinhmun hi sawi thiam pawh a harsa. Kan player tam tak tel loa insiamrem kan zir a ngai," tiin a sawi.

Arsenal hi an khelh fuh ni chuan team hlauhawm an ni. Premier League champion Manchester City lakah pawh inkhel hmuhnawm an chhawp chhuak, mahse an khelh fuh loh chuan Championship club Nottingham Forest lakah an mualpho.

Khelh fuh leh fuh loh inkar a zau a, tun hnaia an chak hleih theih lohna hmun Anfield ngeia hnehna hlado chham tur chuan tihsual an neih tlem a pawimawh dawn. Arteta-a'n amah aia thawnhriat nei ṭha Klopp el turin theihna a nei tawk em tih fiahna pawh a ni ang.