Djokovic a insawifiah

Tennis chanchinthar luah khattu Novak Djokovic chuan a chunga thil thleng a sawifiah a, hripui laka invenna a lak loh chhan pawh thil hriat sual palh awm vang a nih thu a sawi chhuak.

Serbian star hian nikum khan vawi hnih ngawt coronavirus a kai, buaina leh harsatna erawh a nei hran lo. December thla kha a kai hnuhnung zawk chu a ni a, hemi ṭum hian media lamin vaccine la duh leh lak tum lo angin an ziak.

World number 1 Novak chuan, "December thla khan PCR hmangin Covid-19 ka kai tih hriatchhuah a ni, khami ṭuma media lamin thu an chhuah kha hriatfiah tawk loh a awm. A bik takin Australia ram nena inzawmna nei lo kha ziah zawm palh a ni," tiin a sawi.

Australian Open 2022 khel tur tan vaccine lak ngei a ngai tih a ni a, invenna hi a duh reng vanga la lo a ni lo niin a sawi. Hripui a kaina a la rei lo a, hei vang hian ngaihhnathiamna a dil a, a zin dawna an thil tih danah erawh tihsual an nei tih a pha lo.

Djokovic chuan, "Ka agent khan tih sual palh a nei bawk, ka zin kual dan a ziah kha tih sual palh liau liau a ni," a ti. Lehkhaah chuan Australia a pan hma hian ni 14 chhung zin chhuak lo anga ziah a ni a, hemi chhung hian Serbia aṭangin Spain a pan a ni.

Australian Open champion lai Djokovic chuan sawi zawmin, "Ka team-te chuan thil thleng chungchang sawifiahna hi Australia sorkar hnenah an thlen tawh, thil a nih dan taka ziah lan a ni," tiin an insawifiah thu a sawi bawk.

Djokovic hi Australia pa turin visa pek a ni a, a zin pawh a zin ngei. Mahse, chawpchilh takin a visa hi cancel sak a ni a, court an thlen hnuah a visa hi a nung leh hnuhnawh - tun chuan Australia ramah khung beh ni loin a awm thei.

Australian Open khel turin a inbuatsaih nghal. Tournament buatsaihtu lam pawhin seeded pakhatna an pe a, sorkar lamin thu thar an nei leh thut a nih lem loh chuan season khat chhunga Grand Slam hmasa ber hi a khel thei dawn niin a lang.

Tennis hard court inelna lian Australian Open hi January 17 aṭangin Melbourne Park-ah an khel ṭan dawn.