Asia Cup-ah Remsiami a tel

Hockey India-in nimin khan Asia Cup khel tur India hmeichhe team squad a puang a, player 18 zingah Mizo nula Lalremsiami Hmar a tel.

Asia Cup hi Muscat, Oman-ah January 21-28, 2022 hian khelh a ni dawn a, India hi group A-ah Japan, Malaysia leh Singapore te nen awmho. Inelnaah hian team pariat an tel a, group pahnihah ṭhen niin Group khat aṭangin team pahnihin semifinal an lut dawn.

India hian tawnhriat nei ṭha Rani Rampal an chhawr thei dawn lo a, goalkeeper Savita-i'n captain hna a chelh ang a, vice captain atan defender Deep Grace Ekka an ruat bawk.

Inelna neih hnuhnun ber kum 2017-ah khan India-in nomawi an chawi a, Mizo nula Remsiami'n goal hnih khungin semifinal-a Japan an hneh ṭum pawhin goal a khung.

India hmeichhe team
Goalkeepers: Savita (C), Rajani Etimarpu.
Defenders: Deep Grace Ekka (VC), Gurjit Kaur, Nikki Pradhan, Udita.
Midfielders: Nisha, Sushila Chanu, Monika, Neha, Salima Tete, Jyoti, Navjot Kaur.
Forwards: Navneet Kaur, Lalremsiami, Vandana Katariya, Mariana Kujur,
Sharmila Devi.