Hamilton hma hun a chiang lo

Lewis Hamilton hma hun a chiang lo mek, tun ṭuma a hma hun chian loh dan hi Mercedes nena an inkar ni loin thuneitu sang Federation Internationale de l'Automobile (FIA) nena an boruak vang a ni zawk.

Season hmasa intlansiak hnuhnung berah khan Hamilton hi intlansiak tawp dawnah Max Verstappen-a'n a tlan pel a, nomawi a kawl lai chu a chhuhsak zui bawk - thil thlen danah Lewis chuan thil fel lo leh chhui chian ngai awm ngeiah a ngai.

Mercedes team boss Toto Wolff pawhin F1 thuneitu sang laka an lawm loh thu hi a lo sawi tawh. Khawthlang media te chuan, "Hamilton hian rorelna dik a hmuh loh chuan FIA a ring ngam tawh lo," an ti hial a, Britain star hian thu thar sawi erawh a nei rih lo.

Abu Dhabi Grand Prix-ah champion tur tih chian a ni a, lap hnuhnung ber an tlan laiin safety car a lut. Hetih lai hian Red Bull hian Max-a car ke (tyre) an thlaksak a, chumi hnuah Mercedes driver Lewis hi ropui takin a tlan pel.

Mercedes lam mit aṭang chuan FIA race director Michael Masi-a'n intlansiak a kiahhruai dan, a bik tain safety car tlan luh chhunga hun an hman danah dan dik lo a awm ngeiah an ngai a, mahse hei hian result a ti danglam phak tawh lo.

BBC chuan Hamilton chungchangah Mercedes hi be nghal a, mahse F1 team hlun leh ṭha tak hian thu chhuah an la neih theih loh thu an sawi. FIA lamin Abu Dhabi chungchangah thil tih a nei em tih an la ngaichang tih an sawi thung.

Hamilton hi kum 37 mi a ni tawh, tunah hian Mercedes tan 2023 thleng daih contract a nei mek. Mercedes hian season thar aṭanga Hamilton-a teammate turin George Russell an nei thar a, ruahman dan chuan season tharah an inkawp dawn.

Britain star Hamilton-a'n F1 title hi vawi sarih a la tawh a, champion hnem ber Michael Schumacher nen an record a intluk mek. Vawi khat lek pawh a champion leh a nih chuan record thar a siam ang, mahse Max a awm ve miau avangin a awlsam dawn lo.

F1 chawlhsan pawh ni se Lewis hi car intlansiakna huangah chuan hriatreng a ni tawh dawn a, driver ropui bik a ni kumkhua tawh ang - a duhthusama a hun hnuhnung hmang tur erawh chuan a awlsam dawn lo tih a chiang.

Thu leng vak anga Hamilton a chawl tak tak a nih chuan Mercedes lamin rang takin a hmunruak luahtu an zawn a ngai dawn. Season thara intlansiak hmasa ber atan March 20 hian Bahrain Grand Prix an tlan ang.