Reds-ah thil uchuak ka phut lo - Salah

Liverpool forward Mohamed Salah chuan Anfield-a cham ngei a duh thu a sawi a, contract thar ziah chungchanga an indawrnaah, "Thil uchuak tak engmah dil ka nei lo," tiin club tan buaina tur awma a hriat loh thu a sawi.

June thlaa kum 30 tling tawh tur Salah hian Anfield-ah thla 18 dang cham turin contract a la nei mek a, Liverpool hian a phut ang contract an pe thei lo a nih chuan a chhuah ngei a rinawm.

Salah chuan, "Anfield-a cham ka duh a, mahse, ka kutah engmah a innghat lo. Anmahni duhthlannaah a innghat a, thil uchuak tak engmah dil ka nei lo a ni," a ti.

Jurgen Klopp-a'n Liverpool team a dintharna kawnga thawhhlawk tak Salah hian Reds tan Premier League leh Champions League nomawi a chawi tawh a, match 229 khelhsakin goal 148 a khung a, assist vawi 56 a nei.

Salah chuan, "Duh i nei a, i duh chu an pe thei che tih an lantir tawh bawk si chuan club tana i hnathawh avanga an lawmna entir nan i duh chu an pe mai tur che a ni.

"Anfield-ah kum nga ka awm tawh a, he club hi ka hrechiang hle. Fan-te ka hmangaih a, anni pawhin min ngaina tih ka hria. Thuneitute pawh kan duh kan hrilh tawh a, thutlukna chu an kutah a awm," a ti.

Salah hian tun season-ah match 26 khelin goal 23 a khung tawh a, assist vawi kua a nei bawk. Egyptian forward chuan, "Khawvela footballer ṭha ber nih ka duh leh duh loh min zawt a nih chuan, Liverpool-a ka awm chhan pawh a ni.

"Dawt sawiin khawvela footballer ṭha ber nih ka ngaihtuah loh thu ka sawi thei lo. Khawvela footballer ṭha ber nih ka duh a, mahse, Ballon d'Or dawng lo pawhin nun duhawm tak ka nei tawh.

"Awh em em ka nei lo a, engkim hi a ṭha vek a ni," tiin a sawi a, mi tam takin tun dinhmuna footballer ṭha bera an ngaih hian Ballon d'Or dawn a châk tih a lang.

Hetihlai hian Salah hian Liverpool-a cham turin kar khata £300,000 bawr vel hlawh a phut nia sawi a ni a, tun dinhmunah hian kar khatah £200,000 a hlawh niin an sawi.

Cristiano Ronaldo-a'n Manchester United-ah kar khatah £510,000 a hlawh mek a, Man-chester City midfielder Kevin de Bruyne-a'n kar khatah £400,000 a hlawh bawk - Salah aia hlawh hnem hi Premier League-ah player 16 vel an awma ngaih a ni!

Salah hian kar khatah £300,000 hlawh pawh ni se, David De Gea (£375,000), Jadon Sancho (£350,000), Raphael Varane (£340,000) leh Romelu Lukaku (£325,000) te a la phak dawn chuang lo.

Egypt tana AFCON khela thang mek player hian hlawh tihsan bakah, player langsar lakluh belh a phut bawk nia sawi a ni a, Liverpool nen an inrem thei dawn em, tih chu thil hriat châkawm tak a ni ta.