AFCON: Nigeria hmaah Egypt an tlawm nghal
Kum 2004 hnua a vawi khat nan AFCON group stage match-ah Egypt an tlawm a, anmahni ang thoa team ṭha Nigeria chuan 1-0 in an hneh.
Leicester City striker Kelechi Iheanacho chuan inkhela goal awmchhun hi minute 30-naah a khung a, Mohamed Salah telna Egypt lamin a chhanletna tur an nei lo.
AFCON champion ngun ber Egypt tlawm laiin champion lai Algeria an chak zo bik lo a, kum 1996 hnua a vawi khat nana AFCON-a inlan Sierra Leone nen 0-0 in an inhnehtawk.
Algeria hi international match 35 zet chu tlawm loin an kaltluang ta a, Italy record (37 matches) tluk turin match hnih tlawm loh bak an mamawh tawh lo.
Aigupta aiah Nigeria
AFCON-a team ṭha ber pawl pahnih an intawng a, Nigeria-in ṭha taka an khelhchhuah laiin Egypt erawhin beisei an phak lo hle.
Super Eagles (Nigeria sawina) hian club nena inbiak fuh tawk loh vangin striker ṭha pathum Victor Osimhen (Napoli), Emmanuel Dennis (Watford) leh Odion Ighalo (Al Shabab) an chhawr thei lo a, mahse, Iheanacho-a'n zo takin a mawhphurhna a hlen.
Foxes striker hian goal a khung bakah first half chhung zawngin a hmuhnawm tluan chhuak zak a, Taiwo Awoniyi tana a siamsak Union Berlin striker-in goal-a a lo chantir lohte chu uiawm a tling.
Egypt keeper Mohamed El Shenawy a che ṭha a, Awoniyi ball tauh bar-a a dan per te, CSKA Moscow winger Chidera Ejuke vawi hnih a dan te chu a ti ṭha takzet.
Beisei phak lo
Nigeria an khel ṭha a, Egypt-in beisei an phak lo thung. AFCON-a vawi sarih ngawt champion thei team hian champion zia an chhuah lo a, minute 70 chhungin vawi khat chiah shot an nei!
Liverpool tana season duhawm tak hmangtu Mohamed Salah pawh tlarhmaah khawhar takin a awm a, Egyptian King hming lem an pek hian Africa chu a lal ram a ni tih a lantir thei lo.
Salah hian bench aṭanga luhtir Ahmed Sayed siamsak hmangin chance vawi khat a nei a, hemi tih loh erawh uanpui tham chance sawi tur a awm lo - khel chhe zawk an tlawm.
Egypt tan insiamṭha turin hun erawh a la awm a, group stage match-a an la hmachhawn leh tur hi Guinea-Bissau leh Sudan an ni - tunah erawh group mawngphah luahtu an ni!
Algeria an chelh
Egypt ropui loh zanah champion lai Algeria-in eng an ang bik lo a, FIFA ranking-a 108-na Sierra Leone nen 0-0 in an inhnehtawk - nomawi humhim an duh chuan hmasawn an mamawh.
Sierra Leone tan keeper Mohamed Nbalie Kamara chu fak tlak a ni a, an ram club East End Lions tana khel kum 22 mi keeper hian Yacine Brahimi, Manchester City forward Riyad Mahrez, Islam Slimani, Ramy Bensebaini leh Baghdad Bounedjah te chance duhawm neih chu a dansak vek.
Mak takin Sierra Leone hian chance an nei ve tho a, Danish Superliga club Randers FC forward Alhaji Kamara chuan chance duhawm vawi hnih a hlah a, a goal khung chu offside vangin pawm a ni lo bawk.
Mohamed Buya Turay chuan Sierra Leone tan chance a nei ve bawk a, a tawpah erawh team pahnihin goal an khung lo ve ve a, point khata lawm zawk chu Sierra Leone an ni.
A danglam
Kum 26 hnua a vawi khat nan AFCON khel turin Sierra Leone an inpetkai a, a ram pum phurin an phur - an ram a rethei a, 2000 km vela hla Cameroon-a an ram inkhel en tura zin chu fans tam tak tan a hautak.
Fans ṭhenkhat chuan a kal theih dan dapin a ṭhen chu lawng hmangin an kal a, inkhelh hmaa an hnam hla an play laite chuan player ṭhenkhat chuan an mittui an dang zo lo - an tan a hlu em a ni.
Champion lai Algeria an inhnehtawkpui avangin player tam zawk chu champion ang maiin an lawm a, an demawm hran lo - Sierra Leone tan hian Steven Caulker pawh a inlan a, Tottenham Hotspur defender hlui hian England tan vawi khat khelin goal khat a lo khung tawh.
Queens Park Rangers leh Liverpool tan pawha lo khel tawh defender hian Turkish Super Lig club Gaziantep tan a khel a, England tana a inlan kha friendly match a nih angin Sierra Leone-ah a inlet a, tun hi international football-a competitive match a khelh hmasak ber a ni.
January 11, Thawhlehni Zan
Algeria 0 - 0 Sierra Leone
Nigeria 1 - 0 Egypt
NIG: Kelechi Iheanacho 30'
Sudan 0 - 0 Guinea-Bissau
Zanin Inkhel Tur
Cameroon 09:30 PM Ethiopia
Cabo Verde 12:30 AM Burkina Faso